ജപ്തി നോട്ടീസ് കിട്ടിയതിനെ തുടർന്ന് കുടുംബം ആത്മഹത്യയ്‌ക്ക് ശ്രമിച്ചു; ഒരാളുടെ നില ഗുരുതരം, സഹകരണ ബാങ്കിൽ നിന്നും എടുത്തത് 22 ലക്ഷം രൂപ

തൃശൂർ: വായ്പാ കുടിശികയിൽ സഹകരണ ബാങ്കിൽ നിന്നും ജപ്തി നോട്ടിസ് ലഭിച്ചതിനെതുടർന്ന് കൊരട്ടിയിൽ മൂന്നംഗ കുടുംബം ആത്മഹത്യയ്‌ക്ക് ശ്രമിച്ചു. ഒരാളുടെ നില അതീവ ഗുരുതരമാണ്. കാതിക്കുടം സ്വദേശി തങ്കമണി (69) , മരുമകൾ ഭാഗ്യലക്ഷ്മി (48), അതുൽ കൃഷ്ണ (10) എന്നിവരെയാണ് ഗുരുതരാവസ്ഥയിൽ കണ്ടെത്തിയത്. പായസത്തിൽ ഉറക്കഗുളിക കലർത്തി കഴിച്ചതാണെന്നാണ് പുറത്തുവരുന്ന സൂചന.

ഈ കുടുംബം സഹകരണ ബാങ്കിൽ നിന്ന് 22 ലക്ഷം രൂപ വായ്പയെടുത്തിരുന്നു. ഇതിന്റെ തിരിച്ചടവ് മുടങ്ങിയപ്പോൾ ജപ്തിയായി മാറുകയായിരുന്നു. ഇതിനായി വീട്ടിൽ നോട്ടിസ് പതിച്ചിരുന്നു. ഇതിൽ മനംനൊന്താണ് കുടുംബത്തിന്റെ പ്രവൃത്തിയെന്നാണ് കരുതുന്നത്. കാതികൂടം സ്വദേശിയായ വത്സന്റെ ഭാര്യയാണ് ഭാഗ്യലക്ഷ്മി. വൽസൻ പുറത്തുപോയ സമയത്തായിരുന്നു ആത്മഹത്യാശ്രമം.

10 വയസ്സുകാരനായ അതുൽ കൃഷ്ണ ഹൃദ്രോഗിയായിരുന്നു. ഈ കുട്ടിക്ക് വേണ്ടി നാട്ടുകാർ ശ്രമങ്ങൾ തുടരുന്നതിനിടെയാണ് സംഭവമുണ്ടായത്. പായസത്തിൽ ഉറക്കഗുളിക കലർത്തി തങ്കമണിക്കും അതുൽ കൃഷ്ണയ്‌ക്കും നൽകിയത് ഭാഗ്യലക്ഷ്മി ആണെന്ന് കൊരട്ടി പോലീസ് കണ്ടെത്തി.