പത്തനംതിട്ട: സഹസ്ര കലശാഭിഷേക നിറവിൽ കന്നിമാസ പൂജകൾ പൂർത്തിയാക്കി ശബരിമലയിൽ നട അടച്ചു. ഇനി തുലാമാസ പൂജകൾക്കായി ഒക്ടോബർ 17-ന് സന്നിധാനത്ത് നട തുറക്കും. പുതിയ മേൽശാന്തിക്കായുള്ള നറുക്കെടുപ്പ് ഒക്ടോബർ 18-ന് സന്നിധാനത്ത് നടക്കും. ക്ഷേത്രത്തിൽ ഒക്ടോബർ 18 മുതൽ 22 വരെ പൂജകൾ ഉണ്ടാകും.
സഹസ്ര കലശങ്ങൾ ഇന്നലെ ഉച്ചയോടെയാണ് അയ്യപ്പ വിഗ്രഹത്തിൽ അഭിഷേകം ചെയ്തത്. വാദ്യമേളങ്ങളുടെ അകമ്പടിയോടെയാണ് ബ്രഹ്മകലശങ്ങൾ ശ്രീകോവിലിൽ എത്തിച്ചത്. തന്ത്രി കണ്ഠരര് മഹേഷ് മോഹനരര് വിഗ്രഹത്തിൽ സഹസ്രകലശാഭിഷേകം നടത്തി. വൈകിട്ട് ജപമാലയും ദണ്ഡും അണിയിച്ച് യോഗ നിദ്രയിലാക്കി ക്ഷേത്ര നട അടച്ചു.
