ഖാലിസ്ഥാന്‍ തീവ്രവാദിയുടെ കൊലപാതകത്തെ ചൊല്ലി ഇന്ത്യ -കാനഡ ബന്ധം വഷളായിരിക്കെ തന്റെ അനുഭവം വെളിപ്പെടുത്തി നടി കങ്കണ റണാവത്. ഖാലിസ്ഥാനികള്‍ക്ക് എതിരെ സംസാരിക്കാന്‍ തുടങ്ങിയപ്പോള്‍ മുതല്‍ തന്റെ സിനിമകള്‍ക്ക് പഞ്ചാബില്‍ നിരോധനമുണ്ടെന്നും സിഖ് സമൂഹം ബഹിഷ്‌കരിക്കുകയാണെന്നും നടി വെളിപ്പെടുത്തി.
ഞാന്‍ ഖാലിസ്ഥാനികള്‍ക്കെതിരെ സംസാരിച്ചപ്പോള്‍, ഞാന്‍ മുഴുവന്‍ സിഖുകാര്‍ക്കും എതിരാണെന്ന് ബോധ്യപ്പെടുത്താന്‍ അവര്‍ക്ക് കഴിഞ്ഞു. ഇന്നും എന്റെ സിനിമകള്‍ പഞ്ചാബില്‍ നിരോധിച്ചിരിക്കുന്നു. സിഖ് സമൂഹത്തെ തെറ്റിദ്ധരിപ്പിക്കാന്‍ എളുപ്പമാണ്- ഇന്‍സ്റ്റാഗ്രാമില്‍ കങ്കണ കുറിച്ചു.
”സിഖ് സമൂഹം ഖാലിസ്ഥാനികളില്‍ നിന്ന് സ്വയം അകന്ന് കഴിയണം. കൂടുതല്‍ സിഖുകാര്‍ അഖണ്ഡ ഭാരതത്തെ പിന്തുണയ്‌ക്കണം. സിഖ് സമൂഹം എന്നെ ബഹിഷ്‌കരിച്ചു. പഞ്ചാബില്‍ എന്റെ സിനിമകള്‍ക്കെതിരെ അവര്‍ എത്ര അക്രമാസക്തമായി പ്രതിഷേധിക്കുന്നു. ഖാലിസ്ഥാനി ഭീകരത അവരെ മോശക്കാരാക്കി മാറ്റുന്നു. അത് മുഴുവന്‍ സിഖ് സമൂഹത്തിന്റെയും വിശ്വാസ്യതയെയും നശിപ്പിക്കും. ജയ് ഹിന്ദ്.”- കങ്കണ ഇന്‍സ്റ്റാഗ്രാമില്‍ കുറിച്ചു.
കങ്കണയുടെ അടുത്ത ചിത്രം പി വാസുവിന്റെ തമിഴ് ഹൊറര്‍ കോമഡി ചന്ദ്രമുഖി 2 ആണ്. രാഘവ ലോറന്‍സിനൊപ്പമാണ് ഈ ചിത്രത്തില്‍ താരം അഭിനയിക്കുന്നത്. ചിത്രം ഈ മാസം 28 ന് തിയേറ്ററുകളില്‍ റിലീസ് ചെയ്യും.
പ്രതികരിക്കാൻ ഇവിടെ എഴുതുക: