മലപ്പുറം: കടബാധ്യതയെ തുടര്ന്ന് ബാങ്കുകാര് വീട് ജപ്തി ചെയ്ത മലപ്പുറം പാതിരിപ്പാടത്തെ സലീനയ്ക്ക് സഹായവുമായി നിലമ്പൂര് പാലേമാട് വിവേകാനന്ദ ട്രസ്റ്റ് ചെയര്മാന് കെ ആര് ഭാസ്കരന് പിള്ള. വായ്പാ തുകയായ നാല് ലക്ഷം രൂപ നല്കുമെന്നും ബാക്കി തുക സമാഹരിച്ചു നല്കുമെന്നും അദ്ദേഹം വെളിപ്പെടുത്തി. ഇക്കാര്യം ബാങ്കിനെ അറിയിച്ചു. സലീനയ്ക്ക് സ്വന്തം വീട്ടില് തന്നെ ജീവിക്കാനുള്ള സാഹചര്യം ഒരുക്കുമെന്നും ഭാസ്ക്കരപിള്ള പറഞ്ഞു.
ജപ്തി ചെയ്ത വീടിന്റെ താക്കോല് നിലമ്പൂര് സഹകരണ അര്ബന് ബാങ്ക് മടക്കി നല്കി. വായ്പാ തുക തിരിച്ചടയ്ക്കാന് സാവകാശം നല്കിയതോടെ സലീനയും മകനും വീട്ടില് തിരികെ പ്രവേശിച്ചു. തുകയില് ഇളവ് നല്കാമെന്നും ബാങ്ക് അധികൃതര് അറിയിച്ചു.
മക്കളുടെ വിവാഹത്തിനായി സലീന നാലു ലക്ഷം രൂപ 2015 ലാണ് വായ്പയെടുത്തത്. ഇതിനിടെ വീണ് ഇടതുകാല്മുട്ട് ഒടിഞ്ഞതോടെ ജോലിക്കു പോകാനാകാതെ വായ്പാ തിരിച്ചടവും മുടങ്ങി. പിഴപ്പലിശ ബാങ്ക് ഒഴിവാക്കിയിട്ടും ആറരലക്ഷം രൂപ അടയ്ക്കാനുണ്ട്.
