തിരുവനന്തപുരം: മുഖ്യമന്ത്രി പിണറായി വിജയന്‍ വേദിയില്‍ പ്രസംഗിക്കുമ്പോള്‍ സദസ്സില്‍ എഴുന്നേറ്റ് നില്‍ക്കുന്ന നടന്‍ ഭീമന്‍ രഘുവിന്റെ വീഡിയോയാണ് സമൂഹമാധ്യമങ്ങളില്‍ ഇപ്പോള്‍ ചര്‍ച്ചവിഷയം. സംഭവം ഇന്നലെ നിശാഗന്ധി ഓഡിറ്റോറിയത്തിലാണ് നടന്നത്. 2022ലെ സംസ്ഥാന ചലച്ചിത്ര പുരസ്‌കാര വിതരണ ചടങ്ങില്‍ പങ്കെടുക്കാനാണ് ഇരുവരും എത്തിയത്.
പിണറായി വിജയന്‍ സംസാരിച്ചു തീരുന്നതുവരെ ഒരേ നില്‍പ്പായിരുന്നു നടന്‍. സദസ്സിലെ മറ്റ് കലാകാരന്മാര്‍ ഭീമന്‍ രഘുവിന്റെ പ്രവര്‍ത്തികണ്ട് ചിരിയടക്കാന്‍ കഴിയാതെ ഇരിക്കുന്നതും വീഡിയോയില്‍ കാണാം. മുഖ്യമന്ത്രിയുടെ പ്രസംഗം മുഴുവന്‍ നിന്നു കേള്‍ക്കുകയും കയ്യടിക്കുകയുമായിരുന്നു നടന്‍.
എന്നാല്‍ മുഖ്യമന്ത്രിയോട് ബഹുമാനമാണെന്നും അദേഹം നല്ലൊരു അച്ഛനാനെന്നും ഭീമന്‍ രഘു പറഞ്ഞു. അദ്ദേഹം ഏത് പ്രോഗ്രാമില്‍ വന്നാലും അവിടെ ഞാനുണ്ടെങ്കില്‍ മുന്‍ സീറ്റിലാണെങ്കിലും പിന്‍ സീറ്റിലാണെങ്കിലും എണീറ്റ് നില്‍ക്കും. കാരണം ഞാന്‍ അദ്ദേഹത്തെ ബഹുമാനിക്കുന്നു. നല്ലൊരു അച്ഛനാണ്, നല്ലൊരു മുഖ്യമന്ത്രിയാണ്, നല്ലൊരു കുടുംബനാഥനാണ്.
എനിക്ക് എന്റെ അച്ഛനെയാണ് ഓര്‍മ്മ വരുന്നത്. അദ്ദേഹവുമായി സാമ്യം ഉണ്ടോ എന്ന് എനിക്ക് ചില സമയങ്ങളില്‍ തോന്നാറുണ്ട്. രാഷ്‌ട്രീയത്തിന്റെ പേരിലല്ല ഞാന്‍ എഴുന്നേറ്റ് നില്‍ക്കുന്നത്. ബഹുമാനം കൊണ്ട് മാത്രമാണ്. വ്യക്തിപരമായി തന്നെ അദ്ദേഹത്തെ എനിക്ക് ഇഷ്ടമാണെന്നും ഭീമന്‍ രഘു മാധ്യമങ്ങളോട് പറഞ്ഞു.
പ്രതികരിക്കാൻ ഇവിടെ എഴുതുക: