ചാത്തൻസേവയുടെ മറവിൽ പെൺകുട്ടിയെ പീഡിപ്പിച്ചു; കണ്ണൂരിൽ പോക്സോ കേസിൽ വ്യാജസിദ്ധൻ അറസ്റ്റിൽ

കൂത്തുപറമ്പ്: ചാത്തൻസേവയുടെ മറവിൽ പ്രായപൂർത്തിയാകാത്ത പെൺകുട്ടിയെ പീഡിപ്പിച്ച വ്യാജ സിദ്ധൻ അറസ്റ്റിൽ. കൂത്തുപറമ്പ് എലിപ്പറ്റിച്ചിറ സൗപർണികയിൽ ജയേഷ് കോറോത്ത (44)യെയാണ് പോക്സോ കേസിൽ പോലീസ് അറസ്റ്റ് ചെയ്തത്. കൂത്തുപറമ്പിൽ മന്ത്രവാദകേന്ദ്രം നടത്തുന്ന ഇയാൾ ഇവിടെ വച്ച് പെൺകുട്ടിക്ക് നേരെ നിരവധി തവണ ലൈംഗികാതിക്രമം കാട്ടിയെന്ന പരാതിയിലാണ് അറസ്റ്റ്.

കൂത്തുപറമ്പിൽ ഏറെനാളായി മന്ത്രവാദകേന്ദ്രം നടത്തുന്നയാളാണ് ജയേഷ്. പഠനത്തിൽ മികവുണ്ടാവാൻ വേണ്ടിയാണ് പെൺകുട്ടിയെ രക്ഷിതാക്കൾ കേന്ദ്രത്തിൽ കൊണ്ടുവന്നത്. ഏറെനാൾ പെൺകുട്ടി ഇവിടെയായിരുന്നു. സ്കൂളിൽ നിന്നും ക്ലാസ് കഴിഞ്ഞ് മടങ്ങിയാൽ മന്ത്രവാദകേന്ദ്രത്തിലേക്ക് വരാനും ഇയാൾ നിർദേശിച്ചിരുന്നു. തുടർന്നാണ് പ്രതി പെൺകുട്ടിയെ പീഡിപ്പിച്ചതെന്നാണ് പരാതി.

ഇതിനു മുമ്പും പോലീസ് ഇയാളെ കസ്റ്റഡിയിലെടുക്കുകയും താക്കീത് ചെയ്ത് വിട്ടയുക്കുകയും ചെയ്തിരുന്നു. ഒൻപതാം ക്ലാസുകാരിയായ മകളെ വശീകരിച്ചുവെന്ന പരാതിയെ തുടർന്നാണ് സിദ്ധനെ ചോദ്യം ചെയ്യാൻ അന്ന് വിളിപ്പിച്ചത്. എന്നാൽ പെൺകുട്ടിയുടെ മാതാപിതാക്കൾ രേഖാമൂലം പരാതി നൽകാൻ വിസമ്മതിച്ചതോടെ നടപടി വൈകുകയായിരുന്നു. തുടർന്ന് പെൺകുട്ടിയെ കൗൺസലിങിന് വിധേയമാക്കിയപ്പോഴാണ് പീഡന വിവരമുൾപ്പെടെ പുറത്തറിഞ്ഞത്.