കുടിശികയ്‌ക്ക് തെളിവ് പുറത്തുവിടൂ: കണക്ക് നിരത്തി വെല്ലുവിളിച്ച് വി. മുരളീധരന്‍

കോട്ടയം: നെല്‍കര്‍ഷകര്‍ക്ക് സംഭരണത്തുക നല്കാനാകാത്തത് കേന്ദ്രസഹായം ലഭ്യമാകാത്തത് കൊണ്ടെന്ന കൃഷിമന്ത്രിയുടെ വിശദീകരണത്തിന് കേന്ദ്രമന്ത്രി വി. മുരളീധരന്റെ ചുട്ട മറുപടി.
നെല്ലിന്റെ കണക്ക് കൊടുത്തിട്ടും കുടിശിക കിട്ടാനുണ്ട് എന്ന വാദത്തിന് നിരക്കുന്ന തെളിവുകള്‍ കൃഷി മന്ത്രി പി. പ്രസാദ് പുറത്ത് വിടണമെന്ന് വി. മുരളീധരന്‍ ആവശ്യപ്പെട്ടു. ഓണക്കിറ്റ് മുതല്‍ നെല്ലുവില വരെ എന്തിനുമേതിനും കേന്ദ്രത്തെ പഴിചാരി രക്ഷപ്പെടാന്‍ നോക്കരുതെന്ന് കേന്ദ്രമന്ത്രി പറഞ്ഞു. കേരളത്തിന് അര്‍ഹതപ്പെട്ട അണാപ്പൈസ പോലും കേന്ദ്രം പിടിച്ചുവയ്‌ക്കാറില്ല. ചട്ടങ്ങള്‍ പാലിച്ച് സംസ്ഥാനത്തിന് അര്‍ഹതപ്പെട്ട തുക പൂര്‍ണമായും നല്കിയിട്ടുണ്ടെന്നും കണക്കുകള്‍ നിരത്തി മന്ത്രി വിശദീകരിച്ചു.
ആരോഗ്യമേഖലയ്‌ക്കുള്ള ഗ്രാന്റ് ഇനത്തില്‍ 2021-22 സാമ്പത്തിക വര്‍ഷം 521.43 കോടി നല്കി, 2022-23 ല്‍ 421.81 കോടി നല്കി. അനുവദിച്ച തുക 50 ശതമാനത്തിന് മേല്‍ ചെലവഴിക്കണമെന്ന മാനദണ്ഡം പാലിക്കാത്തത് കൊണ്ടാണ് ഇനി കിട്ടാനുള്ളത് നല്കാത്തത്. മില്യണ്‍ പ്ലസ് സിറ്റീസ് ഗ്രാന്റ് ഇനത്തില്‍ 2021-22ല്‍ 256 കോടി നല്കി. 2022-23ല്‍ അനുവദിക്കപ്പെട്ട 265 കോടിയില്‍ 213.4 കോടി നല്കി. ധനകാര്യ കമ്മിഷന്‍ അനുവദിച്ചതിനെക്കാള്‍ കൂടുതല്‍ കടമെടുപ്പ് ഈ കഴിഞ്ഞ രണ്ട് സാമ്പത്തിക വര്‍ഷവും അനുവദിച്ചു.
വികസന, ക്ഷേമ പ്രവര്‍ത്തനങ്ങള്‍ക്കായുള്ള മൂലധനനിക്ഷേപം 2023-24ല്‍ 1,925 കോടി അനുവദിച്ചു. കഴിഞ്ഞ വര്‍ഷം ലഭിച്ച തുക പൂര്‍ണമായി പ്രയോജനപ്പെടുത്താത്തതിനാല്‍ ഇത് നല്കിയിട്ടില്ല. 2021-22, 2022-23 വര്‍ഷത്തെ ധനക്കമ്മി ഗ്രാന്റുകള്‍ പൂര്‍ണമായി നല്കി. 2023-24ന്റേത് പ്രതിമാസ ഇന്‍സ്റ്റാള്‍മെന്റുകളായി നല്കി വരുന്നെന്നും കേന്ദ്രമന്ത്രി പറഞ്ഞു.
ഏത് മേഖലയില്‍ പ്രതിസന്ധി വന്നാലും കേന്ദ്രത്തെ പഴിക്കാം എന്ന മുഖ്യമന്ത്രിയുടെ ക്യാപ്‌സൂള്‍ കൈയിലിരിക്കട്ടെയെന്നും വി. മുരളീധരന്‍ പറഞ്ഞു. ഒരുവശത്ത് പ്രതിസന്ധി പറയുന്നവരാണ് മറുവശത്ത് ഹെലികോപ്റ്ററിന് ലക്ഷങ്ങള്‍ പൊടിക്കുന്നത്. ദല്‍ഹിയില്‍ കേരളത്തിന് വേണ്ടി സംസാരിക്കാന്‍ ഒരു കാബിനറ്റ് പ്രതിനിധിക്ക് വേണ്ടി ലക്ഷങ്ങള്‍ ചെലവാക്കുന്നു. ജനങ്ങള്‍ക്ക് എല്ലാം മനസിലാകുന്നുണ്ടെന്നും അവര്‍ ഇതിന് മറുപടി പറയുമെന്നും കേന്ദ്രമന്ത്രി പറഞ്ഞു.