പുതുപ്പള്ളിയില്‍ ഇന്ന് കലാശക്കൊട്ട്

പുതുപ്പള്ളി (കോട്ടയം): ആഴ്ചകള്‍ മാത്രം നീണ്ടുനിന്ന ഉപതെരഞ്ഞെടുപ്പ് പ്രചാരണങ്ങള്‍ക്കൊടുവില്‍ പുതുപ്പള്ളിയില്‍ ഇന്ന് കൊട്ടിക്കലാശം. സ്ഥാനാര്‍ഥികള്‍ അവസാനവട്ട മണ്ഡല പര്യടനത്തിലാണ്. എന്‍ഡിഎ, എല്‍ഡിഎഫ്, യുഡിഎഫ് മുന്നണികളുടെ പ്രധാനപ്പെട്ട നേതാക്കളെല്ലാം പുതുപ്പള്ളിയിലുണ്ട്. പാമ്പാടി കേന്ദ്രീകരിച്ചാണ് കൊട്ടിക്കലാശം.
വാദ്യമേളങ്ങളുടെ അകമ്പടിയോടെ, മുദ്രാവാക്യം വിളിയോടെ ഓരോ മുന്നണിയും കലാശക്കൊട്ട് കളറാക്കും. വൈകിട്ട് മൂന്ന് മണിക്കാണ് എന്‍ഡിഎയുടെ കൊട്ടിക്കലാശം. ആറു മണിയോടെ പരസ്യപ്രചാരണം സമാപിക്കും. തിങ്കളാഴ്ച നിശബ്ദ പ്രചാരണത്തിലാകും സ്ഥാനാര്‍ത്ഥികള്‍.
പുതുപ്പള്ളി എംഎല്‍എ ആയിരുന്ന ഉമ്മന്‍ ചാണ്ടിയുടെ നിര്യാണത്തെ തുടര്‍ന്നാണ് പുതുപ്പള്ളി ഉപതെരഞ്ഞെടുപ്പിലേക്ക് നീങ്ങിയത്. എന്‍ഡിഎയുടെ ജി. ലിജിന്‍ ലാലും യുഡിഎഫിന്റെ ചാണ്ടി ഉമ്മനും എല്‍ഡിഎഫിന്റെ ജെയ്‌ക്.സി. തോമസുമാണ് മത്സര രംഗത്തെ പ്രമുഖര്‍.
സപ്തംബര്‍ 5 ന് രാവിലെ ഏഴ് മുതല്‍ വൈകിട്ട് ആറ് വരെയാണ് പോളിങ്. ഭിന്നശേഷി സൗഹൃദ ബൂത്തുകളും ഹരിത മാര്‍ഗരേഖ പാലിച്ചുള്ള ബൂത്തുകളുമാണ് സജ്ജമാക്കുന്നത്. പുതുപ്പള്ളി നിയോജക മണ്ഡലത്തില്‍ 1,75,605 വോട്ടര്‍മാരാണുള്ളത്. 89,897 സ്ത്രീ വോട്ടര്‍മാരും 85,705 പുരുഷ വോട്ടര്‍മാരും. മൂന്ന് ട്രാന്‍സ്ജെന്‍ഡേഴ്സും. 80 വയസ്സിനു മുകളിലുള്ള 6376 വോട്ടര്‍മാരും ഭിന്നശേഷിക്കാരായ 1765 വോട്ടര്‍മാരുമുണ്ട്.
181 പ്രവാസി വോട്ടര്‍മാരും 138 സര്‍വീസ് വോട്ടര്‍മാരും. 182 പോളിങ്സ്റ്റേഷനുകളാണുള്ളത്. വോട്ടെടുപ്പ് ദിനം എക്‌സിറ്റ് പോളുകള്‍ക്കും നിരോധനമുണ്ട്. എട്ടിന് കോട്ടയം ബസേലിയസ് കോളജിലാണ് വോട്ടെണ്ണല്‍.