ജയ്പൂര്‍: രാജസ്ഥാനില്‍ വനവാസി യുവതിയെ മര്‍ദിച്ച് നഗ്നയാക്കി തെരുവിലൂടെ നടത്തി. എട്ട് പ്രതികളെ തിരിച്ചറിഞ്ഞു. ഭര്‍ത്താവുള്‍പ്പെടെ മൂന്ന് പേരെ പോലീസ് അറസ്റ്റ് ചെയ്തു. പ്രതാപ്ഗഡ് ജില്ലയിലാണ് സംഭവം. വെള്ളിയാഴ്ച വീഡിയോ പ്രചരിച്ചതോടെയാണ് സംഭവം പുറംലോകമറിയുന്നത്. സഹായമഭ്യര്‍ഥിച്ച് നിലവിളിക്കുന്ന ദൃശ്യങ്ങളാണ് വീഡിയോയിലുള്ളത്.
ഇരുപത്തൊന്നുകാരിയായ യുവതിക്ക് മറ്റൊരാളുമായി അടുപ്പമുണ്ടെന്നാരോപിച്ചായിരുന്നു ഭര്‍ത്താവിന്റെയും ബന്ധുക്കളുടെയും ക്രൂരത. മറ്റൊരാളോടൊപ്പം താമസിച്ചിരുന്ന യുവതിയെ അവിടെ നിന്ന് ഭര്‍ത്താവും ബന്ധുക്കളും ചേര്‍ന്ന് തട്ടിക്കൊണ്ട് വരികയായിരുന്നു. തുടര്‍ന്ന് മര്‍ദിച്ച് നഗ്നയാക്കി കിലോമീറ്ററുകളോളം നടത്തിച്ചുവെന്നും രാജസ്ഥാന്‍ ഡിജിപി ഉമേഷ് മിശ്ര അറിയിച്ചു.
കൂടുതല്‍ പേരുടെ അറസ്റ്റ് ഉടന്‍ ഉണ്ടാകും. അന്വേഷണത്തിനായി പോലീസിന്റെ ആറ് സംഘങ്ങളെ നിയോഗിച്ചിട്ടുണ്ടെന്നും പോലീസ് അറിയിച്ചു. രാജസ്ഥാന്‍ മുഖ്യമന്ത്രി അശോക് ഗെഹ്‌ലോട്ട് സംഭവത്തില്‍ നടുക്കം രേഖപ്പെടുത്തി. രാജസ്ഥാന്‍ സര്‍ക്കാരിനെതിരെ ബിജെപി നേതൃത്വം രംഗത്തെത്തി.
പാര്‍ട്ടിക്കുള്ളിലെ കലഹം തീര്‍ക്കുന്നതിനുള്ള ശ്രമത്തിലാണ് സംസ്ഥാന സര്‍ക്കാരെന്ന് ബിജെപി ദേശീയ അധ്യക്ഷന്‍ ജെ.പി. നദ്ദ പറഞ്ഞു. സ്ത്രീ സുരക്ഷ ഉറപ്പാക്കുന്നതിനെ രാജസ്ഥാന്‍ സര്‍ക്കാര്‍ പൂര്‍ണമായും അവഗണിക്കുകയാണ്. നടുക്കുന്ന വീഡിയോ ദൃശ്യങ്ങളാണ് പുറത്തു വന്നത്. സംസ്ഥാനത്ത് ഭരണമില്ലാത്ത അവസ്ഥയാണ്. പാര്‍ട്ടിക്കുള്ളിലെ കലഹം തീര്‍ക്കുന്ന തിരക്കിലാണ് സര്‍ക്കാര്‍. ബാക്കി സമയം ന്യൂദല്‍ഹിയിലുള്ള കുടുംബവാഴ്ചക്കാരെ പ്രീതിപ്പെടുത്താനും ചെലവഴിക്കുന്നു. ഓരോ ദിവസവും രാജസ്ഥാനില്‍ നിന്ന് സ്ത്രീകള്‍ക്കെതിരെയുള്ള അതിക്രമങ്ങള്‍ റിപ്പോര്‍ട്ട് ചെയ്യുന്നുവെന്നും നദ്ദ പ്രതികരിച്ചു.
ബിജെപി എംപി ഗജേന്ദ്ര സിങ് ശെഖാവതും സംസ്ഥാന സര്‍ക്കാരിനെ രൂക്ഷമായി വിമര്‍ശിച്ചു. കോണ്‍ഗ്രസ് നേതാവ് രാഹുല്‍ രാജസ്ഥാന്‍ മുഖ്യമന്ത്രിയുടെ രാജി ആവശ്യപ്പെട്ട്, അവിടെ രാഷ്‌ട്രപതി ഭരണം ഏര്‍പ്പാടാക്കണമെന്ന നിലപാട് സ്വീകരിക്കുമോയെന്ന് അദ്ദേഹം ചോദിച്ചു.
Thursday, December 19, 2024
രാജസ്ഥാനില്‍ വനവാസി യുവതിയെ മര്‍ദിച്ച് നഗ്നയാക്കി നടത്തി; ഭര്‍ത്താവുള്‍പ്പെടെ അറസ്റ്റില്‍
ബന്ധപ്പെട്ട വാര്‍ത്തകള്‍
പുതിയ വാര്‍ത്തകള്‍
പ്രതികരിക്കാൻ ഇവിടെ എഴുതുക: