കൊച്ചി : എന്‍ഫോഴ്‌സ്മന്റ് ഡയറക്ടറേറ്റ് ചോദ്യം ചെയ്തതിന് പിന്നാലെ ഇന്‍സ്റ്റഗ്രാം പോസ്റ്റുമായി നടി നവ്യാ നായര്‍. നിങ്ങളില്‍ പാപം ചെയ്യാത്തവര്‍ കല്ലെറിയട്ടെ എന്ന ഹാഷ്ടാഗോടെ നൃത്തത്തെ കുറിച്ച് ജലാലുദ്ദീന്‍ റൂമിയുടെ ഉദ്ധരണി ഉള്‍പ്പെടെ ഡാന്‍സ് വിഡിയോ ആണ് നവ്യ പങ്കുവച്ചത്.
‘നിങ്ങള്‍ തകര്‍ന്നിരിക്കുമ്പോള്‍ വിടര്‍ന്നു നൃത്തം ചെയ്യൂ. നൃത്തം ചെയ്യൂ, മുറിവുകളിലെ തുന്നിക്കെട്ടുകള്‍ വലിച്ചുകീറുമ്പോള്‍. പോര്‍മധ്യത്തിലും നൃത്തം ചെയ്യൂ. നിങ്ങളുടെ രക്തം കൊണ്ട് നൃത്തം ചെയ്യൂ’ എന്നാണ് റൂമിയുടെ വിഡിയോക്ക് ഒപ്പം ചേര്‍ത്തിട്ടുള്ളത്.
ഇന്ത്യന്‍ റവന്യൂ സര്‍വീസ് ഉദ്യോഗസ്ഥന്‍ സച്ചിന്‍ സാവന്ത് പ്രതിയായ അനധികൃത സ്വത്ത് സമ്പാദന കേസിലാണ് നവ്യ നായരെ എന്ഫോഴ്സ്മെന്റ് ഡയറക്ടറേറ്റ് ചോദ്യം ചെയ്തത്. അറസ്റ്റിലായ സച്ചിന്‍ സാവന്തുമായി നവ്യ നായര്‍ക്ക് അടുത്ത സൗഹൃദമുണ്ടെന്നാണ് ഇ.ഡി കണ്ടെത്തല്‍.
മുംബൈയില്‍ രജിസ്റ്റര്‍ ചെയ്ത കള്ളപ്പണം വെളുപ്പിക്കല്‍ കേസിലാണ് ചോദ്യം ചെയ്യല്‍. മുംബൈ എന്ഫോഴ്സ്മെന്റ് ഡയറക്ടറേറ്റ് നവ്യ നായരെ നോട്ടീസ് നല്‍കി മുംബൈയിലേക്ക് വിളിച്ചുവരുത്തിയാണ് ചോദ്യം ചെയ്തത്. സച്ചിന്‍ സാവന്ത് നവ്യ നായര്‍ക്ക് ആഭരണങ്ങള്‍ അടക്കം സമ്മാനിച്ചതായി ഇഡി കുറ്റപത്രത്തിലുണ്ട്.
സച്ചിന്‍ സാവന്ത് എട്ട് തവണ കൊച്ചിയിലെത്തി. മലയാള സിനിമാ രംഗത്തെ നിരവധി പേരുമായി ഇയാള്‍ക്ക് അടുത്ത ബന്ധമുണ്ട്.
സച്ചിന്‍ സാവന്ത് കുടുബസുഹൃത്താണെന്ന് നവ്യ വെളിപ്പെടുത്തി. മുംബെയില്‍ താമസിക്കുമ്പോഴേ അറിയാം.
പ്രതികരിക്കാൻ ഇവിടെ എഴുതുക: