ഇടുക്കി: ചിന്നക്കനാലില്‍ പോലീസ് സംഘത്തിന് നേരെ ഗുണ്ടാആക്രമണം. സിവില്‍ പോലീസ് ഓഫീസര്‍ക്ക് കുത്തേറ്റു. കായംകുളം സ്‌റ്റേഷനിലെ സിവില്‍ പോലീസ് ഓഫീസര്‍ ദീപക്കിനാണ് കുത്തേറ്റത്. സമീപത്തെ ആശുപത്രിയില്‍ പ്രവേശിപ്പിച്ച ഇയാള്‍ അപകടനില തരണം ചെയ്തു.
ഇന്ന് പുലര്‍ച്ചെ രണ്ടിനാണ് സംഭവം. രണ്ട് ദിവസം മുമ്പ് കായംകുളത്തെ ഹോട്ടലുടമയെ തട്ടിക്കൊണ്ടുപോയി മര്‍ദിച്ച ഗുണ്ടാസംഘത്തെ തേടിയെത്തിയ പോലീസുകാര്‍ക്ക് നേരെയാണ് ആക്രമണമുണ്ടായത്. ഈ കേസിലുള്‍പ്പെട്ട നാല് പ്രതികളെ തേടി ഇവരുടെ ഒളിസങ്കേതത്തില്‍ എത്തിയതാണ് അഞ്ച് പേരടങ്ങുന്ന പോലീസ് സംഘം. പോലീസ് എത്തിയ വാഹനത്തിന്റെ താക്കോല്‍ ഊരിയെടുത്ത ശേഷം പത്ത് പേരടങ്ങുന്ന ഗുണ്ടാ സംഘം ഇവരെ വളഞ്ഞിട്ട് ആക്രമിക്കുകയായിരുന്നു.
രണ്ട് പേരെ പോലീസ് കസ്റ്റഡിയിലെടുത്തെങ്കിലും മറ്റുള്ളവര്‍ എത്തി പ്രതികളെ രക്ഷപെടുത്തുകയായിരുന്നു. സംഭവത്തില്‍ നാല് പേരെ കസ്റ്റഡിയില്‍ എടുത്തെന്ന് പോലീസ് അറിയിച്ചു.
പ്രതികരിക്കാൻ ഇവിടെ എഴുതുക: