തേഞ്ഞിപ്പലം(കോഴിക്കോട്): കേരളത്തിലെത്തുന്ന ചരക്ക് വാഹനങ്ങളിലെ ഡ്രൈവര്‍മാര്‍ക്കിടയില്‍ ലഹരി ഉപയോഗം കൂടുതലെന്ന് പഠനറിപ്പോര്‍ട്ട്. കഞ്ചാവിന്റെയും മാരകമായ രാസലഹരികളുടെയും ഉപയോഗം ഉള്ളതായി കാലിക്കറ്റ് സര്‍വകലാശാലയിലെ ഫോറന്‍സിക് സയന്‍സ് പഠന വകുപ്പിലെ (ലൈഫ് സയന്‍സ്) അസിസ്റ്റന്റ് പ്രൊഫസര്‍ ഡോ.എം.എസ്. ശിവപ്രസാദ്, സുവോളജിയിലെ ഡോ.സി.വി. പ്രിയത, അസി. പ്രൊഫസര്‍ ഡോ. ഇ.എം. അനീഷ്, കേരള പോലീസ് അക്കാദമിയിലെ ക്രിമിനോളജിസ്റ്റ് ഡോ. ജയേഷ് കെ.ജോസഫ് എന്നിവര്‍ നടത്തിയ പഠനത്തില്‍ കണ്ടെത്തി.
2021-ല്‍ കേരളത്തിലെ ചെക്ക് പോസ്റ്റുകള്‍ കേന്ദ്രീകരിച്ച് നടത്തിയ പഠന റിപ്പോര്‍ട്ട് അന്താരാഷ്‌ട്ര ജേണലായ ‘ട്രാഫിക് ഇഞ്ച്വറി ആന്‍ഡ് പ്രിവന്‍ഷനില്‍’ (ടി ആന്‍ഡ് എഫ് ഗ്രൂപ്പ്) പ്രസിദ്ധീകരിച്ചു. കാസര്‍ഗോഡ്, മുത്തങ്ങ, വാളയാര്‍ ചെക്ക് പോസ്റ്റുകളില്‍ നിന്ന് ഡ്രൈവര്‍മാരുടെ ഉമിനീര്‍ പരിശോധിച്ചാണ് ലഹരി വസ്തുക്കളുടെ സാന്നിധ്യം സ്ഥിരീകരിച്ചത്. ഇരുപതില്‍ പരം ലഹരിവസ്തുക്കളുടെ ഉപയോഗം അരമണിക്കൂറിനു
ള്ളില്‍ സ്ഥിരീകരിക്കാന്‍ സാധിക്കുന്ന എവിഡന്‍സ് മള്‍ടിസ്റ്റാറ്റ് (Evidence Multistar) കിറ്റുകള്‍ ഉപയോഗപ്പെടുത്തി രാജ്യത്ത് നടന്ന ആദ്യത്തെ പഠനമാണിത്. പരിശോധനാ സ്ഥലത്ത് വച്ചു തന്നെ ഫലം ലഭ്യമാക്കാന്‍ ഇതു വഴി സാധിക്കും.
പഠനം നടത്തിയവരില്‍ 21 ശതമാനം പേരും വിവിധതരം ലഹരിവസ്തുക്കള്‍ ഉപയോഗിച്ചതായി തെളിഞ്ഞു. കഞ്ചാവിന്റെ, പ്രത്യേകിച്ചും കൃത്രിമമായി ഉണ്ടാക്കുന്ന കഞ്ചാവിന്റെ ഉപയോഗമാണ് കൂടുതല്‍ എന്ന് വ്യക്തമായതായി റിപ്പോര്‍ട്ടില്‍ പറയുന്നു. എല്‍എസ്ഡി, എംഡിഎംഎ പോലുള്ള മാരക സിന്തറ്റിക് ലഹരി പദാര്‍ത്ഥങ്ങളുടെ ഉപയോഗവും കണ്ടെത്താന്‍ കഴിഞ്ഞിട്ടുണ്ട്. 26നും 35നും പ്രായമുള്ളവരില്‍ 30 ശതമാനം പേരും 36നും 46നും ഇടയില്‍ പ്രായമുള്ളവരില്‍ 34 ശതമാനം പേരും ലഹരി ഉപയോഗിക്കുന്നതായി കാണപ്പെട്ടു. എക്‌സൈസ് വകുപ്പിന്റെ സഹകരണത്തോടെയാണ് പഠനം നടത്തിയത്.
പ്രതികരിക്കാൻ ഇവിടെ എഴുതുക: