കൊച്ചി: പിറവം അരീക്കല്‍ വെള്ളച്ചാട്ടം കാണാനെത്തിയ സ്ത്രീകളോട് മോശമായി പെരുമാറിയതിനെ തുടര്‍ന്ന് അറസ്റ്റിലായ പോലീസുകാരനെ കോടതി 14 ദിവസത്തേക്ക് റിമാന്‍ഡ് ചെയ്തു. മുവാറ്റുപുഴ പോലീസ് സ്റ്റേഷനിലെ സിപിഒ കോതമംഗലം വെണ്ടുവഴി സ്വദേശി എ.എസ്. പരീതിനെയാണ് റിമാന്‍ഡ് ചെയ്തത്. മുവാറ്റുപുഴ സ്റ്റേഷനിലെ പോലീസുകാരനായ പെരുമ്പാവൂര്‍ അശമന്നൂര്‍ സ്വദേശിയായ എ. ബൈജുവിനെ സസ്പെന്‍ഡ് ചെയ്തിട്ടുണ്ട്.
വൈപ്പിനില്‍നിന്ന് വെള്ളച്ചാട്ടം കാണാനെത്തിയ സ്ത്രീകളോടാണ് പരീത് മോശമായി പെരുമാറിയത്. ഇവര്‍ ബഹളം വച്ചതോടെ കൂടെയുണ്ടായിരുന്നവരും നാട്ടുകാരും പരീതിനെയും ബൈജുവിനെയും തടഞ്ഞുവച്ചു. തുടര്‍ന്നാണ് രാമമംഗലം പോലീസ് സ്ഥലത്തെത്തിയത്. ഡ്യൂട്ടിയ്‌ക്കിടെയാണ് ഇരുവരും വിനോദസഞ്ചാര കേന്ദ്രത്തില്‍ എത്തിയത്. ഇവര്‍ മദ്യപിച്ചിരുന്നതായി പോലീസ് പറഞ്ഞു.
അതിക്രമത്തിനിരയായ സ്ത്രീകള്‍ ഇന്നലെ രാവിലെ സ്റ്റേഷനിലെത്തി വിശദമായ മൊഴി നല്‍കി. പരീതാണ് സ്ത്രികളോട് മോശമായി പെരുമാറിയത്. പോലീസുകാര്‍ക്കെതിരെ കേസെടുക്കാന്‍ രാമമംഗലം പോലീസ് ആദ്യം തയ്യാറായില്ല. സംഭവം വിവാദമായതിനെ തുടര്‍ന്നാണ് പിന്നീട് കേസെടുത്തത്.
പ്രതികരിക്കാൻ ഇവിടെ എഴുതുക: