ലണ്ടന്‍: പുതിയ സീസണ്‍ ഇംഗ്ലീഷ് പ്രീമിയര്‍ ലീഗില്‍ ചെല്‍സിക്ക് സമനില തുടക്കം. സ്റ്റാംഫോര്‍ഡ് ബ്രിഡ്ജിലെ തങ്ങളുടെ ആദ്യ ഹോം മത്സരത്തില്‍ ലിവര്‍പൂളിനോടാണ് ചെല്‍സി 1-1ന് സമനില പാലിച്ചത്. ആദ്യം ഗോളടിച്ചത് ലിവര്‍പൂളായിരുന്നു. എന്നാല്‍ ഉജ്ജ്വലമായി പൊരുതിയ ചെല്‍സി സമനില സ്വന്തമാക്കി. ലിവര്‍പൂളിനായി ലൂയിസ് ഡയസും ചെല്‍സിക്കായി അക്‌സല്‍ ഡിസാസിയും ലക്ഷ്യം കണ്ടു.
പന്ത് കൂടുതലും കൈവശം വെച്ചത് ചെല്‍സിയായിരുന്നെങ്കിലും ആദ്യം നിറയൊഴിച്ചത് ലിവര്‍പൂളായിരുന്നു. 18-ാം മിനിറ്റിലായിരുന്നു ഗോള്‍. അവരുടെ സൂപ്പര്‍ താരം മുഹമ്മദ് സാല ബോക്‌സിലേക്ക് നല്‍കിയ സുന്ദരമായ പാസ് ലൂയിസ് ഡയസ് വലയിലെത്തിക്കുകയായിരുന്നു. പിന്നീട് സാലയും പന്ത് വലയിലെത്തിച്ചെങ്കിലും വാറിലൂടെ ഗോള്‍ അനുവദിച്ചില്ല. 37-ാം മിനിറ്റില്‍ അക്‌സല്‍ ഡിസാസി ചെല്‍സിയുടെ സമനില ഗോള്‍ നേടി. ഇതോടെ ആദ്യപകുതി 1-1 എന്ന നിലയില്‍ പിരിഞ്ഞു.
രണ്ടാം പകുതിയില്‍ വിജയഗോളിനായി രണ്ട് ടീമുകളും കിണഞ്ഞു ശ്രമിച്ചെങ്കിലും കൂടുതല്‍ ഗോള്‍ പിറക്കാതിരുന്നതോടെ കളി സമനിലയില്‍ കലാശിച്ചു.
മറ്റൊരു മത്സരത്തില്‍ ടോട്ടനത്തെ 2-2ന് ബ്രന്റ്‌ഫോര്‍ഡ് സമനിലയില്‍ തളച്ചു.
പ്രതികരിക്കാൻ ഇവിടെ എഴുതുക: