ന്യൂദല്ഹി: ഇന്ത്യന് ശിക്ഷാ നിയമം (ഐപിസി) സംബന്ധിച്ച പുതിയ ബില് രാജ്യദ്രോഹ കുറ്റം പൂര്ണമായും റദ്ദാക്കുമെന്ന് കേന്ദ്ര ആഭ്യന്തര മന്ത്രി അമിത് ഷാ ഇന്ന് ലോക്സഭയില് പറഞ്ഞു. ഐപിസി, ക്രിമിനല് നടപടി ചട്ടം (സിആര്പിസി), ഇന്ത്യന് എവിഡന്സ് ആക്ട് എന്നിവയ്ക്ക് പകരമായി മൂന്ന് ബില്ലുകള് ഷാ ലോക്സഭയില് അവതരിപ്പിച്ചു. ബില്ലുകള് പാര്ലമെന്ററി സ്റ്റാന്റിങ് കമ്മിറ്റിക്ക് വിടും.
നിലവില് രാജ്യത്തുള്ള ക്രിമിനല് നിയമങ്ങള് ബ്രിട്ടീഷുകാരുണ്ടാക്കിയതാണ്. ഇതിന് മാറ്റമുണ്ടാകണം. പുതിയ ബില്ലിനു കീഴില് ഞങ്ങള് രാജ്യദ്രോഹം പോലുള്ള നിയമങ്ങള് റദ്ദാക്കുകയാണെന്ന് ഹൗസില് മൂന്ന് ബില്ലുകളെക്കുറിച്ച് സംസാരിക്കവെ അമിത് ഷാ പറഞ്ഞു. രാജ്യം ഓഗസ്റ്റ് 16 മുതല് സ്വാതന്ത്ര്യത്തിന്റെ 75 മുതല് 100 വര്ഷം വരെയുള്ള ഘട്ടത്തിലേക്ക് കടക്കുകയാണ്. ഈ കാലസമയത്തു തന്നെയാണ് അടിമത്ത മാനസികാവസ്ഥ അവസാനിപ്പിക്കുമെന്ന് പ്രധാനമന്ത്രി പ്രതിജ്ഞയെടുത്തും.
ഇതിന്റെ ഭാഗമാണ് ഐപിസി (1857), സിആര്പിസി (1858), ഇന്ത്യന് എവിഡന്സ് ആക്ട് (1872) എന്നിവ അവസാനിപ്പിക്കുന്നതും. ഇതിനു പകരം ജനങ്ങളുടെ അവകാശ സംരക്ഷണം ഉറപ്പാക്കാന് തങ്ങള് മൂന്ന് പുതിയ നിയമങ്ങള് കൊണ്ടുവരുകയാണ്. ശിക്ഷയല്ല നീതി നല്കാനാണ് അത് ലക്ഷ്യമിടുന്നതെന്നും അമിത് ഷാ പറഞ്ഞു. ക്രിമിനല് നിയമങ്ങളിലെ അടിമത്തത്തിന്റെ 475 അടയാളങ്ങള് സര്ക്കാര് അവസാനിപ്പിക്കുമെന്നും അദ്ദേഹം കൂട്ടിച്ചേര്ത്തു. ആളുകളിപ്പോള് ഭയപ്പാടോടെയാണ് കോടതിയില് പോകുന്നത്. കോടതിയില് പോകുന്നത് ശിക്ഷയാണെന്നാണ് അവര് കരുതുന്നതും അദേഹം പറഞ്ഞു.
