ന്യൂദല്ഹി: ഇന്ത്യാ വിരുദ്ധ പ്രചാരണങ്ങള്ക്ക് ദല്ഹിയിലെ ന്യൂസ് ക്ലിക്ക് ഓണ്ലൈന് മാധ്യമത്തിന് വിദേശത്തു നിന്നു ലഭിച്ചത് 86 കോടി രൂപ. ഇക്കാര്യം ഇ ഡി അന്വേഷിക്കുന്നു. അധികം വൈകാതെ കുറ്റപത്രം സമര്പ്പിക്കും.ഇന്ത്യാ വിരുദ്ധ പ്രചാരണത്തിന് ചൈനയില് നിന്ന് യുഎസ് കോടീശ്വരന് നെവില് റോയി സിംഘാം വഴി ഇന്ത്യയിലെ ചില മാധ്യമങ്ങള് കോടികള് കൈപ്പറ്റിയെന്ന് ന്യൂയോര്ക്ക് ടൈംസ് കഴിഞ്ഞ ദിവസം റിപ്പോര്ട്ട് ചെയ്തിരുന്നു.അതില് ന്യൂസ് ക്ലിക്കിന്റെ പേര് എടുത്തു പറയുന്നുണ്ട്. ന്യൂസ് ക്ലിക്ക് എന്ന രാജ്യവിരുദ്ധ, പോര്ട്ടല് കമ്പനിയിലേക്കാണ് പണമെത്തിയത്. വന്തോതില് വിദേശ ഫണ്ട് ലഭിച്ചെന്നു കണ്ടെത്തി ഇ ഡി ഇവര്ക്കെതിരേ നടപടി തുടങ്ങിയപ്പോള് മാധ്യമ സ്വാതന്ത്ര്യമെന്ന പേരില് ഇവരുടെ രക്ഷയ്ക്കെത്തിയത് കോണ്ഗ്രസും രാഹുലുമായിരുന്നു.
പ്രബീര് പുര്കായസ്ഥയാണ് എഡിറ്റര് ഇന് ചീഫ്. ഇയാളുടെ വസതിയില് നിന്ന് 2021 സപ്തംബറില് ഇ ഡി റെയ്ഡില് രേഖകള് പിടിച്ചെടുത്തിരുന്നു. 2018 മാര്ച്ച് മുതല് 2021 സപ്തംബര് വരെയായി, ന്യൂസ് ക്ലിക്കിന് അമേരിക്കയിലെ നെവില് റോയി സിംഘാമിന്റെ ജസ്റ്റിസ് ആന്ഡ് എജ്യൂക്കേഷന് ഫണ്ടില് നിന്ന് 76.84 കോടി രൂപയും ദി ട്രൈകോണ്ടിനെന്റല് ലിമിറ്റഡില് നിന്ന് 1.61 കോടി രൂപയും ജിസ്പാന് എല്എല്സിയില് നിന്ന് 26.98 ലക്ഷം രൂപയും സെന്ട്രോ പോപ്പുലര് ഡി മിദാസില് നിന്ന് (ബ്രസീല്) 2.03 ലക്ഷം രൂപയും ലഭിച്ചതായി ഇ ഡി മനസിലാക്കി. ചില സേവനങ്ങള്ക്കു പണം വാങ്ങിയെന്നാണ് രേഖകളില്. എന്നാല് എന്തു സേവനമാണ് നല്കിയതെന്ന് രേഖകളിലില്ല.
ഇതിനു പുറമേ 2018 ഏപ്രിലില് പിപികെ ന്യൂസ് ക്ലിക്ക് സ്റ്റുഡിയോ പ്രൈവറ്റ് ലിമിറ്റഡില് 9.59 കോടി രൂപയുടെ വിദേശ നിക്ഷേപമെത്തി. യുഎസിലെ വേള്ഡ് വൈഡ് മീഡിയ ഹോള്ഡിങ്സ് എല്എല്സി എന്ന സ്ഥാപനം പണം നിക്ഷേപിച്ച ശേഷം പൂട്ടി. നെവില് റോയി സിംഘാമിന്റെ ജസ്റ്റിസ് ആന്ഡ് എജ്യൂക്കേഷന് ഫണ്ടാണ് ഈ കമ്പനി വഴി ന്യൂസ് ക്ലിക്കില് പണം നിക്ഷേപിച്ചതെന്നാണ് ഇ ഡി അറിഞ്ഞത്.
ന്യൂസ് ക്ലിക്ക് എഡിറ്റര് ഇന് ചീഫ് പുര്കായസ്ഥ നെവിലിന്റെ അടുത്ത സുഹൃത്താണ്. ജസ്റ്റിസ് ആന്ഡ് എജ്യൂക്കേഷന് ഫണ്ടില് നിന്ന് ന്യൂസ് ക്ലിക്കിലെത്തിയ പണത്തിന്റെ അന്തിമാവകാശി നെവില് തന്നെയാണെന്ന് ന്യൂസ് ക്ലിക്കിലെ ഒരു ഓഹരിയുടമ ചോദ്യം ചെയ്യലില് ഇ ഡിയോടു സമ്മതിച്ചു. രാജ്യവിരുദ്ധ വീഡിയോകളുണ്ടാക്കി യൂട്യൂബില് അടക്കം പ്രചരിപ്പിക്കാനാണ് പിപികെ ന്യൂസ് ക്ലിക്ക് സ്റ്റുഡിയോ പ്രൈവറ്റ് ലിമിറ്റഡ് സ്ഥാപിച്ചത്. ദല്ഹി സാകേതിലുള്ള പുര്കായസ്ഥയുടെ 4.52 കോടിയുടെ ഫ്ളാറ്റും 41 ലക്ഷം രൂപയുടെ സ്ഥിരം നിക്ഷേപവും ഇ ഡി കണ്ടുകെട്ടിയിട്ടുണ്ട്.
