യുവതിയെന്ന് തെറ്റിദ്ധരിപ്പിച്ച് പ്രവാസിയുടെ പണം തട്ടിയ കോട്ടയം സ്വദേശി പിടിയില്‍

കാഞ്ഞാണി: യുവതിയെന്ന് തെറ്റിദ്ധരിപ്പിച്ച് വ്യാജ ഫെയ്‌സ്ബുക്ക് ഐ.ഡി. ഉണ്ടാക്കി മെസഞ്ചര്‍ ചാറ്റ് വഴി സൗഹൃദം സ്ഥാപിച്ച് അന്തിക്കാട് സ്വദേശിയായ പ്രവാസിയില്‍ നിന്ന് രണ്ടര ലക്ഷം രൂപ തട്ടിയെടുത്ത കേസില്‍ കോട്ടയം സ്വദേശിയായ യുവാവ് പിടിയില്‍. കോട്ടയം പാമ്പാടി സ്വദേശി കുരിയന്നൂര്‍ കുന്നേല്‍ കണ്ണ (34) നെയാണ് അന്തിക്കാട് പോലീസ് അറസ്റ്റ് ചെയ്തത്.

2022 ജൂണിലാണ് പെണ്‍കുട്ടിയുടെ പ്രൊഫൈല്‍ ചിത്രമുള്ള ഫേസ്ബുക്ക് അക്കൗണ്ട് വഴി അന്തിക്കാട്ടെ യുവാവിനെ കണ്ണന്‍ പരിചയപ്പെടുന്നത്. ഒരിക്കല്‍ പോലും നേരില്‍ കാണാത്ത യുവതിയുമായി യുവാവ് മെസഞ്ചര്‍ ചാറ്റില്‍ സജീവമായി. ഇതിനിടെ തന്റെ കുഞ്ഞ് ആശുപത്രിയില്‍ ആണെന്നും 5000 രൂപ ഉടനെ അയക്കണമെന്നും യുവതി ചാറ്റിലൂടെ ആവശ്യപ്പെട്ടതോടെയാണ് തട്ടിപ്പിന്റെ തുടക്കം ആരംഭിച്ചത്. സൗഹൃദത്തിലുള്ളത് യുവതിയാണെന്ന വിശ്വാസത്തില്‍ യുവാവ് 5000, 10,000, 20,000 എന്നിങ്ങനെ പലപ്പോഴായി പണം വാങ്ങിക്കൊണ്ടേയിരുന്നു. പിന്നീട് സൗഹൃദം ഭീഷണിയിലേക്ക് എത്തി. തുടര്‍ന്നും പണം നല്‍കാനാവില്ലെന്ന് യുവാവ് പറഞ്ഞതോടെ മെസഞ്ചര്‍ ചാറ്റിലെ അശ്ലീല സംഭാഷണങ്ങളുടെ സ്‌ക്രീന്‍ഷോട്ട് എടുത്ത് വീട്ടുകാര്‍ക്ക് കൈമാറുമെന്ന് ഭീഷണിപ്പെടുത്തിയതോടെ യുവാവ് വീണ്ടും വഴങ്ങി. ഇങ്ങനെ പലപ്പോഴായി രണ്ടര ലക്ഷം രൂപ തട്ടിയെടുക്കുകയായിരുന്നു. ഫേസ്ബുക്കിലെ യുവതിയുടെ സഹോദരന്‍ എന്ന പേരില്‍ ഫോണില്‍ വിളിച്ചും വാട്‌സ്ആപ്പ് വഴിയുമൊക്കെയാണ് കണ്ണന്‍ വിദേശത്ത് ജോലിയുള്ള  യുവാവില്‍ നിന്നും പണം കൈക്കലാക്കിയിരുന്നത്. 

ഏറ്റവും ഒടുവില്‍ 75,000 നല്‍കിയാല്‍ പ്രശ്‌നം തീര്‍ക്കാമെന്ന് ഭീഷണി വന്നപ്പോള്‍ യുവാവ് തൃശൂര്‍ റൂറല്‍ പോലീസ് മേധാവി ഐശ്വര്യ ഡോംഗ്രേക്ക് പരാതി നല്‍കിയതോടെ കളി കാര്യമായി. റൂറല്‍ എസ്പിയുടെ പ്രത്യേക സംഘം നടത്തിയ പരിശോധനയില്‍ യുവതിയുടെ പേരില്‍ വ്യാജ ഫേസ്ബുക്ക് ഐ.ഡി. ഉണ്ടാക്കി മെസഞ്ചര്‍ വഴി യുവാവില്‍ നിന്ന് പണം തട്ടുകയാണെന്ന കാര്യം ബോധ്യപ്പെട്ടു. തുടര്‍ന്നാണ് ഇയാളെ പിടികൂടിയത്. കോടതിയില്‍ ഹാജരാക്കി റിമാന്റ് ചെയ്തു. ഇയാള്‍ സമാനമായ മറ്റു തട്ടിപ്പുകളില്‍ ഏര്‍പ്പെട്ടിട്ടുണ്ടോ എന്നും പോലീസ് പരിശോധിക്കുന്നുണ്ട്.