തൃശൂര്: നെല്ല് ഉത്പാദന രംഗത്ത് സ്വയംപര്യാപ്തതയുടെ മാതൃകയായി മറ്റത്തൂര് മട്ട. പരീക്ഷണാടിസ്ഥാനത്തില് നടത്തിയ നെല്ല് കൃഷിയുടെ ഒന്നാംഘട്ടം പൂര്ത്തീകരണത്തിലേക്ക് എത്തുമ്പോള് മികച്ച അനുഭവമാണ് മറ്റത്തൂര് ഗ്രാമപഞ്ചായത്തിന് പങ്കുവയ്ക്കാനുള്ളത്. 18 പാടശേഖരങ്ങളുള്ള ഗ്രാമപഞ്ചായത്തില് 250 ഹെക്ടറോളം നെല്കൃഷി ഉണ്ട്. ഇവിടെ ഉത്പാദിപ്പിക്കുന്ന നെല്ല് ഗ്രാമപഞ്ചായത്തിന്റെ നേതൃത്വത്തില് സംഭരിച്ച് കുത്തി അരിയാക്കി പ്രാദേശികമായി വിറ്റഴിക്കുക എന്നതാണ് മറ്റത്തൂര് മട്ട പദ്ധതിയിലൂടെ ലക്ഷ്യമിട്ടത്. പാലക്കാടന് മട്ടയോട് സ്വാദില് കിടപിടിക്കുന്ന മട്ട അരിയാണ് കൃഷി ചെയ്തത്. ആദ്യഘട്ടത്തില് ഉണ്ടമട്ട, മനുരത്ന ഇനങ്ങളില് പെട്ടവയാണ് കൃഷിയിറക്കിയത്. ഇതിലൂടെ 3500 കിലോ നെല്ല് സംഭരച്ചു. പഞ്ചായത്തില് തന്നെയുള്ള ഒരു വനിതാ സംരംഭകയുടെ മില്ലില് നെല്ലു കുത്തി 1500 കിലോയോളം അരി ലഭിച്ചു.
10 കിലോ അടങ്ങുന്ന 150 പാക്കറ്റുകളിലായി ഗ്രാമപഞ്ചായത്ത് മുഖേനയാണ് ഇവ വിറ്റഴിച്ചത്. പരീക്ഷണാടിസ്ഥാനത്തില് നടത്തിയ ഈ മുന്നേറ്റത്തില് ഗ്രാമപഞ്ചായത്തിന് ലാഭമായി 60,000 രൂപ ലഭിച്ചു. കിലോ 55 രൂപ നിരക്കിലാണ് അരി വിറ്റത്.
വടി മട്ട വിഭാഗത്തില്പ്പെട്ട ഇനമാണ് രണ്ടാംഘട്ടത്തില് കൃഷിയിറക്കിയിരിക്കുന്നത്. ഇതില് നിന്നും 10,000 കിലോ നെല്ല് സംഭരിക്കാനാണ് ലക്ഷ്യമിടുന്നത്. ഇതോടൊപ്പം ഉപോത്പന്നങ്ങളായ തവിട്, പൊടിയരി എന്നിവയും ഗുണമേന്മ കൂടിയ ഇനത്തില്പ്പെട്ട തവിടുള്ള അരി തുടങ്ങിയവയും വില്ക്കാന് ലക്ഷ്യമിടുന്നുണ്ട്.
ഭൂപ്രകൃതിപരമായ സാധ്യതകളും ഗുണമേന്മയും സ്വാദുമാണ് മറ്റത്തൂര് മട്ടയെ വേറിട്ടതാക്കുന്നത്. രണ്ടാം ഘട്ട കൊയ്ത്ത് നവംബറില് പൂര്ത്തിയാക്കും.
