മുംബൈ: ജസ്പ്രീത് ബുംറയുടെ തിരിച്ചുരവ് സ്ഥിരീകരിച്ചു. ദിവസങ്ങള്‍ക്ക് മുമ്പ് നല്‍കിയ സൂചന പോലെ അയര്‍ലന്‍ഡിനെതിരായ ട്വന്റി20 പരമ്പരയിലൂടെയാണ് താരത്തിന്റെ നീണ്ട കാലത്തിന് ശേഷമുള്ള തിരിച്ചുവരവ്. പരമ്പരയില്‍ ഇന്ത്യന്‍ ടീമിനെ നയിക്കുന്നത് ബുംറയായിരിക്കും.
16 അംഗ ടീമിനെയാണ് ഇന്നലെ രാത്രിയോടെ ഇന്ത്യന്‍ ക്രിക്കറ്റ് കണ്‍ട്രോള്‍ ബോര്‍ഡ് പ്രഖ്യാപിച്ചത്. കഴിഞ്ഞ വര്‍ഷം സപ്തംബറിലാണ് ഇതിന് മുമ്പ് ബുംറ കളിച്ചത്. പരിക്കും പുറംവേദനയും കാരണം ശസ്ത്രക്രിയക്ക് വരെ വിധേയനാകേണ്ടിവന്നതിനാല്‍ കളിയില്‍ നിന്നും വിട്ടുനില്‍ക്കുകയായിരുന്നു. ഐപിഎല്‍ പൂര്‍ണമായും ഒഴിവാകുമെന്ന വാര്‍ത്ത വന്നപ്പോള്‍ ഏകദിന ലോകകപ്പില്‍ തിരിച്ചെത്തുമോയെന്ന ആശങ്ക ഉടലെടുത്തിരുന്നു.
പരിമിത ഓവര്‍ മത്സരങ്ങളിലെ ഇന്ത്യന്‍ താരം റുട്ടുരാജ് ഗെയ്ക്‌വാദ് ആയിരിക്കും അയര്‍ലന്‍ഡിനെതിരായ ട്വന്റി20 പരമ്പരയിലെ ഉപനായകന്‍. സീനിയര്‍ താരങ്ങള്‍ക്കെല്ലാം വിശ്രമം നല്‍കുന്നതിനാലാണ് അയര്‍ലന്‍ഡിനെതിരെ ബുംറയുടെ നേതൃത്വത്തിലുള്ള ടീമിനെ പ്രഖ്യാപിച്ചത്.
ടീം: ജസ്പ്രീത് സിങ് ബുംറ(നായകന്‍) റുട്ടുരാജ് ഗെയ്ക്‌വാദ്, യശസ്വി ജയ്‌സ്വാള്‍, തിലക് വര്‍മ, റിങ്കു സിങ്, സഞ്ജു സാംസണ്‍(വിക്കറ്റ് കീപ്പര്‍), ജിതേഷ് ശര്‍മ(വിക്കറ്റ് കീപ്പര്‍), ശിവം ദുബെ, വാഷിങ്ടണ്‍ സുന്ദര്‍, ഷഹ്ബാസ് അഹമ്മദ്, രവി ബിഷ്‌നോയ്, പ്രസീദ് ക്രിഷ്ണ, അര്‍ഷദ്വീപ് സിങ്, മുകേഷ് കുമാര്‍, ആവേശ് ഖാന്‍.
പ്രതികരിക്കാൻ ഇവിടെ എഴുതുക: