തിരുവനന്തപുരം : തിരുവനന്തപുരം ചെമ്പകമംഗലത്ത് ഓടിക്കൊണ്ടിരുന്ന കെഎസ്ആര്‍ടിസി ബസിന് തീപിടിച്ചു. ശനിയാഴ്ച രാവിലെയാണ് അപകടം സംഭവിക്കുന്നത്. ഉടന്‍ തന്നെ വാഹനം നിര്‍ത്തി യാത്രക്കാരെ പുറത്തിറക്കിയതിനാല്‍ വന്‍ അപകടം ഒഴിവായി. ആര്‍ക്കും പരിക്കില്ല.
ആറ്റിങ്ങലില്‍ നിന്നും തിരുവനന്തപുരത്തേക്ക് പുറപ്പെട്ട ഓര്‍ഡിനറി ബസിനാണ് തോന്നയ്‌ക്കലിനും മംഗലപുരത്തിനും ഇടയിലായാണ് തീപിടിച്ചത്. ചെമ്പകമംഗലം ജംഗ്ഷനില്‍ എത്തിയപ്പോള്‍ ബസ് ബ്രേക്ക്ഡൗണായി. ഡ്രൈവര്‍ ബസില്‍ നിന്ന് പുറത്തിറങ്ങി വാഹനം പരിശോധിക്കുന്നതിനിടെ സമീപത്തത്തെ ഓട്ടോ ഡ്രൈവര്‍മാരാണ് ബസ്സിനടിയില്‍ നിന്ന് പുക ഉയരുന്ന കാര്യം അറിയിച്ചത്.
ഇതോടെ ഡ്രൈവര്‍ യാത്രക്കാരോടെല്ലാം വാഹനത്തില്‍ നിന്നും പുറത്തിറങ്ങാനാവശ്യപ്പെടുകയായിരുന്നു. ആളുകള്‍ പുറത്തിറങ്ങിയതിനു പിന്നാലെ തീ ആളിക്കത്തി. ബസിന്റെ ഉള്‍വശം പൂര്‍ണമായും കത്തി നശിച്ചു. ഫയര്‍ഫോഴ്സ് സ്ഥലത്തെത്തിയാണ് തീയണച്ചത്. ആറ്റിങ്ങില്‍ നിന്ന് രണ്ട് യൂണിറ്റ് അഗ്നി രക്ഷാ സംഘമാണ് സ്ഥലത്തെത്തിയത്. പെട്ടന്ന് തന്നെ ഡ്രൈവര്‍ യാത്രക്കാരെയെല്ലാം പുറത്തിറക്കിയതാണ് അപകടം ഒഴിവാക്കിയത്. പൂര്‍ണമായും കത്തിനശിച്ച ബസ് ദേശീയ പാതയില്‍ നിന്നു മാറ്റാനുള്ള ശ്രമത്തിലാണ്.
പ്രതികരിക്കാൻ ഇവിടെ എഴുതുക: