തൃശൂരിൽ വൃദ്ധ ദമ്പതികളെ ചെറുമകന്‍ വെട്ടിക്കൊന്നു; കൊലപാതക വിവരം ആദ്യമറിഞ്ഞത് ഭക്ഷണവുമായി എത്തിയ ബന്ധു

തൃശൂര്‍: മുത്തച്ഛനെയും മുത്തശിയെയും ചെറുമകന്‍ വെട്ടിക്കൊലപ്പെടുത്തി. തൃശൂര്‍ വടക്കേക്കാട് വൈലത്തൂരിലാണ് ദാരുണസംഭവം. വടക്കേക്കാട് സ്വദേശി പനങ്ങാവിൽ വീട്ടിൽ അബ്ദുള്ളക്കുട്ടി (75), ഭാര്യ ജമീല (64) എന്നിവരാണ് കൊല്ലപ്പെട്ടത്. തിങ്കളാഴ്ച രാവിലെയാണ് സംഭവം. അക്മൽ എന്ന മുന്നയാണ് കൊലപാതകം നടത്തിയത്.  

ദമ്പതികളുടെ ചെറുമകന്‍ മാനസികാരോഗ്യത്തിന് മുമ്പ് ചികിത്സയിലായിരുന്നെന്ന് പോലീസ് പറഞ്ഞു. പ്രതിയെ പോലീസ് കസ്റ്റഡിയില്‍ എടുത്തിട്ടുണ്ട്. തിരൂരിലെ മാനസികാരോഗ്യ കേന്ദ്രത്തിൽ നിന്ന് കഴിഞ്ഞ ദിവസമാണ് ചെറുമകനെ വീട്ടിലേക്ക് തിരികെ കൊണ്ടുവന്നത്. മുത്തശ്ശനും മുത്തശ്ശിക്കുമൊപ്പമാണ് താമസം. അക്മലിന്റെ ഉമ്മ വേറെ വിവാഹം കഴിച്ചു പോയിരുന്നു.

ഇന്ന് രാവിലെ ഭക്ഷണവുമായെത്തിയ ബന്ധുവാണ് കൊലപാതക വിവരം ആദ്യമറിഞ്ഞത്. ഗുരുവായൂർ എ സി പി കെ ജി സുരേഷിന്റെ നേതൃത്വത്തിലുള്ള പോലീസ് സംഘം സംഭവസ്ഥലത്ത് എത്തി മേൽ നടപടികൾ സ്വീകരിച്ചു.