ലഖ്നോ:ദൂരദര്‍ശന്‍ കാലത്ത് ഇന്ത്യക്കാരുടെ ഹരമായ രാമാനന്ദ സാഗറിന്റെ ‘രാമായണ്‍’ എന്ന ആത്മീയ പരമ്പരയിലെ സീതയായി അഭിനയിച്ച നടി ഞായറാഴ്ച അയോധ്യയിലെ രാമക്ഷേത്രം സന്ദര്‍ശിച്ചു. രാമായണ്‍ പരമ്പരയിലെ സീതയായിരുന്ന ദീപിക് ചിഖ് ലിയയ്ക്ക് അയോധ്യയില്‍ ഊഷ്മള സ്വീകരണം ലഭിച്ചു. ദീപിക ചിഖ് ലിയയുടെ അയോധ്യ ക്ഷേത്രം സന്ദര്‍ശിക്കുന്ന വിവിധ ഫോട്ടോകള്‍ വൈകാതെ സമൂഹമാധ്യമങ്ങളില്‍ വൈറലായി.
പഴയ രാമായണ്‍ പരമ്പര കണ്ട പലരും പിങ്ക് സാരി ചുറ്റി എത്തിയ പഴയ സീതയെ കണ്ടപ്പോള്‍ ബഹുമാനപുരസ്സരം തല കുനിച്ചു. പലരും ദീപിക ചിഖ് ലിയയുടെ കഴുത്തില്‍ മാലയണിച്ചു. രാമവിഗ്രഹത്തിന്റെ മുന്നില്‍ ഇരിക്കുന്ന സീതയായ ദീപിക ചിഖ് ലിയയുടെ ഫോട്ടോ സമൂഹമാധ്യമങ്ങളില്‍ വൈറലായിരുന്നു. പല ഭക്തരും ദീപിക ചിഖ് ലിയയില്‍ നിന്നും അനുഗ്രഹവും വാങ്ങി.
അയോധ്യയിലെ രാമക്ഷേത്രത്തില്‍ എത്താന്‍ കഴിഞ്ഞതില്‍ സന്തോഷമുണ്ടെന്നും ദീപിക പറഞ്ഞു. ക്ഷേത്രത്തിന്റെ പണി പൂര്‍ത്തിയായാല്‍ താന്‍ വീണ്ടും തിരിച്ചെത്തുമെന്നു ദീപിക പറഞ്ഞു. ആദ്യമായാണ് അവര്‍ അയോധ്യ സന്ദര്‍ശിക്കുന്നത്. “ഇതാദ്യമായാണ് അയോധ്യയില്‍ രാമവിഗ്രഹം കാണാന്‍ സാധിച്ചത്. വിഗ്രഹം അതിശയിപ്പിച്ചു. ഞാന്‍ അനുഗ്രഹിക്കപ്പെട്ടവളായി. ഈ രാമവിഗ്രഹം ദര്‍ശിക്കുന്ന ആരുടെയും ദുഖവും വേദനകളും മാഞ്ഞുപോകും. “- ദീപിക പറഞ്ഞു.
അയോധ്യ ദര്‍ശനത്തിന് മുന്‍പ് പഴയ രാമായണ്‍ പരമ്പരയിലെ സീതയുടെ വേഷം കെട്ടിയ ഫോട്ടോ ദീപിക സമൂഹ മാധ്യമങ്ങളില്‍ പങ്കുവെച്ചിരുന്നു. രാമനെ കാട്ടിലേയ്‌ക്കയക്കുമ്പോള്‍ സീത അണിഞ്ഞ അതേ വേഷത്തിലാണ് ദീപിക പ്രത്യക്ഷപ്പെട്ടത്. ജനങ്ങളുടെ അഭ്യര്‍ത്ഥന മാനിച്ചാണ് ഇത്തരമൊരു ഫോട്ടോ പോസ്റ്റ് ചെയ്തിരുന്നത്. സീതയുടെ പല വേഷങ്ങള്‍ അണിഞ്ഞ തന്റെ ഒരു വീഡിയോയും ദീപിക അയോധ്യയിലെ ക്ഷേത്ര ദര്‍ശനത്തിന് മുന്‍പ് പങ്കുവെച്ചിരുന്നു.
പ്രതികരിക്കാൻ ഇവിടെ എഴുതുക: