ചെന്നൈ: തമിഴ്നാട് ഉന്നത വിദ്യാഭ്യാസ മന്ത്രി കെ. പൊന്മുടിയുടെ വസതികളില് എന്ഫോഴ്സ്മെന്റ് ഡയറക്ടറേറ്റ് (ഇഡി) തിങ്കളാഴ്ച നടത്തിയ റെയ് ഡില് കണക്കില്പ്പെടാത്ത 70 ലക്ഷം രൂപ പിടിച്ചു. ഇതിനു പുറമെ 10 ലക്ഷം രൂപയുടെ വിദേശ കറന്സിയും പിടിച്ചെടുത്തു.
സമ്പത്തിക തട്ടിപ്പിനെ തുടര്ന്നാണ് റെയ്ഡ് എന്നാണ് പ്രാഥമിക റിപ്പോര്ട്ട്. ജൂലായ് 17 തിങ്കളാഴ്ച രാവിലെ ഏഴ് മണിക്കാണ് റെയ്ഡ് തുടങ്ങിയത്. വില്ലുപുറത്തുള്ള പൊന്മുടിയുടെ വീട്ടിലായിരുന്നു ആദ്യം റെയ്ഡ് നടന്നത്. അദ്ദേഹത്തിന്റെ മകളുടെ വീട്ടിലും ഇഡി പരിശോധന നടത്തി. ഏഴ് ഇഡി ഉദ്യോഗസ്ഥരാണ് റെയ്ഡ് നടത്തിയത്. അര്ധസൈനിക വിഭാഗങ്ങളെയും വീടിന് മുന്നില് വിന്യസിച്ചിരുന്നു.
ജൂലായ് മാസം തുടക്കത്തില് പൊന്മുടിയെയും മറ്റ് ആറ് പേരെയും ഭൂമി തട്ടിയെടുത്ത കേസില് വിജിലന്സ് ആന്റ് ആന്റി കറപക്ഷന് ഡയറക്ടറേറ്റ് കുറ്റവിമുക്തരാക്കിയിരുന്നു. 1996 മുതല് 2001 വരെ ഡിഎംകെ മന്ത്രിയായിരിക്കെ ചെന്നൈയിലെ സെയ്ദാപേട്ടിലെ സര്ക്കാര് ഭൂമി അനധികൃതമായി തട്ടിയെടുത്തു എന്നതായിരുന്നു കേസ്.
2020ല് പൊന്മുടിയുടെ മകന് ഗൗതം സിംഗമണി ഇഡിയുടെ ശ്രദ്ധയില്പ്പെട്ടിരുന്നു. ഇദ്ദേഹത്തിന്റെ 8.6 കോടിയുടെ അനധികൃത സ്വത്ത് ഇഡി പിടിച്ചെടുത്തിരുന്നു. വിദേശത്ത് നിന്നും വിദേശ പണം അനധികൃതമായി നേടി എന്ന കുറ്റം ഇദ്ദേഹത്തിന് നേരെ ആരോപിച്ചിരുന്നു. കള്ളകുറിച്ചി മണ്ഡലത്തെ പ്രതിനിധീകരിക്കുന്ന എംഡി കൂടിയായ ഗൗതമില് നിന്നും 8.6 കോടി രൂപ വിലമതിക്കുന്ന തമിഴ്നാട്ടിലെ വാണിജ്യ-ഗാര്ഹിക കെട്ടിടങ്ങളും കൃഷിഭൂമിയും ബ്ങ്ക് അക്കൗണ്ടുകളും ഓഹരികളും പിടിച്ചെടുത്തിരുന്നു.
ജൂണില്, മന്ത്രി വി സെന്തില് ബാലാജിയെ എന്ഫോഴ്സ്മെന്റ് ഡയറക്ടറേറ്റ് (ഇഡി) കസ്റ്റഡിയിലെടുത്തതിന് പിന്നാലെയാണ് ഇപ്പോള് മന്ത്രി പൊന്മുടിയുടെ വീട്ടിലും റെയ്ഡ് നടക്കുന്നത്. ഇത് രാഷ്ട്രീയമായ ‘പ്രതികാര നടപടി’യാണെന്ന് ഡിഎംകെ വിമര്ശിച്ചിരുന്നു.
