കവിയൂര്: കവിയൂര് മഹാദേവ ക്ഷേത്ര ശ്രീകോവില് തുറക്കാന് വൈകിയതില് ഭക്തജന നാമജപ പ്രതിഷേധം. ഹിന്ദു ഐക്യ വേദി യുടെയും ക്ഷേത്ര ഏകോപന സമിതിയുടെയും നേതൃത്വത്തില് ക്ഷേത്ര തൃപ്പടിയില് നടന്ന പ്രതിഷേധം ഹിന്ദു ഐക്യവേദി ജില്ലാ സഹസംഘടനാ സെക്രട്ടറി കെ.പി.സുരേഷ് ഉദ്ഘാടനം ചെയ്തു.
എല്ലാം മാസവും ക്ഷേത്രത്തിലെ കാണിക്ക കൃത്യമായി എടുക്കാന് കാണിക്കുന്ന മനസ് ക്ഷേത്രകാര്യങ്ങളില് കാണിക്കണമെന്നും ജീവനക്കാരുടെ അഭാവത്താല് ക്ഷേത്രത്തില് നിത്യപൂജകള് പോലും മുടക്കം വന്നിരിക്കുന്നു എന്നും ഹിന്ദു ഐക്യവേദി ആരോപിച്ചു. ക്ഷേത്രത്തില് ഇപ്പോഴുള്ള ജോലിക്കാരില് പകുതിയും പകരക്കാരാണ് മഹാദേവ നടയിലെ മേൽശാന്തിയും, കീഴ്ശാന്തിയും വരാത്ത കാരണം ഹനുമാന് സ്വാമി നടയിലെ മേല്ശാന്തിയാണ് കഴിഞ്ഞ ദിവസം നട തുറന്നത്. രാവിലെ ഏഴ് മണിയോടെ മുന് കീഴ്ശാന്തി തിരുവല്ലയില് നിന്നും എത്തിയതിന് ശേഷമാണ് അഭിഷേകവും പൂജകളും ആരംഭിച്ചത്.
തിരുവല്ല സബ് ഗ്രൂപ്പിലെ ഏറ്റവും വരുമാനമുള്ള ഈ ക്ഷേത്രത്തില് നിലവില് സബ് ഗ്രൂപ്പ് ഓഫിസര് മേല്ശാന്തി, കീഴ്ശാന്തി, നാദസ്വരം, രണ്ട് വാച്ചര് എന്നിവര് ഇല്ല. അടിയന്തിരമായി ഇതിനു നടപപടി ഉണ്ടായില്ലെങ്കില് മറ്റു പ്രതിഷേധങ്ങളിലേക്ക് കടക്കേണ്ടി വരുമെന്നും ഭക്ത ജനങ്ങള് പറഞ്ഞു. താലൂക്ക് പ്രസിഡന്റ് ടി.എന്.സുരേന്ദ്രന് നായര് അദ്ധ്യക്ഷത വഹിച്ചു. ഹിന്ദു ഐക്യവേദി ജില്ലാ ജനറല് സെക്രട്ടറി കെ.എസ്. സതീശ് കുമാര്, ജില്ലാ വൈസ് പ്രസിഡന്റ് ശ്രീകുമാര് കുറ്റൂര്, താലൂക്ക് ജനറല് സെക്രട്ടറി കിഷോര് കുമാര് , സെക്രട്ടറി രതീഷ് ശര്മ്മ തൈമറവുംകര, ഹിന്ദു ഐക്യവേദി പഞ്ചായത്ത് പ്രസിഡന്റ് മനോഹരന്, ക്ഷേത്ര ഉപദേശകസമിതി സെക്രട്ടറി അനീഷ് കെ.എസ്. വൈസ് പ്രസിഡന്റ സഹദേവന് ,മധുസൂദനന് ആചാരി , ഹരികുമാര് തുടങ്ങിയവര് പ്രസംഗിച്ചു.
