വസ്തു തര്‍ക്കം; വര്‍ക്കലയില്‍ വീട്ടമ്മയെ വെട്ടിക്കൊന്നു, വായിൽ തുണി തിരുകിയ ശേഷം ഭർത്താവിന്റെ സഹോദരങ്ങൾ ആക്രമിക്കുകയായിരുന്നു

തിരുവനന്തപുരം: തിരുവനന്തപുരത്ത് വാക് തർക്കത്തെ തുടര്‍ന്ന് വീട്ടമ്മയെ വെട്ടിക്കൊന്നു. വര്‍ക്കല കളത്തറ സ്വദേശിനി ലീനാമണി(56) ആണ് കൊല്ലപ്പെട്ടത്. വസ്തു തര്‍ക്കത്തെ തുടര്‍ന്നായിരുന്നു ആക്രമണം. ഭര്‍ത്താവിന്റെ ബന്ധുക്കളാണ് വെട്ടിയതെന്ന് ആരോപിച്ച് ലീനാമണിയുടെ ബന്ധുക്കള്‍ രംഗത്തെത്തി. ഇന്ന് രാവിലെ പതിനൊന്ന് മണിയോടെ ലീനാമണിയുടെ ഭർത്താവിന്റെ സഹോദരങ്ങൾ വായിൽ തുണിതിരുകിയതിന് ശേഷം വെട്ടുകയായിരുന്നുവെന്ന് ബന്ധുക്കൾ പറഞ്ഞു.

ഗുരുതരമായി പരിക്കേറ്റ ലീനാമണിയെ വർക്കലയിലെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും ഉച്ചയോടെ മരിക്കുകയായിരുന്നു. ഭർത്താവിന്റെ ബന്ധുക്കളുമായി കുടുംബവീടുമായി ബന്ധപ്പെട്ടായിരുന്നു തർക്കം. ലീനാമണിയുടെ ഭർത്താവ് സിയാദ് മരണപ്പെട്ടിട്ട് കുറച്ചു നാളുകളായി. ഷാജി, അഹദ്, മുഹ്സിൻ എന്നിവരാണ് ലീനാമണിയെ ആക്രമിച്ചത്. ആക്രമണത്തിന് ശേഷം ഇവർ ഓടി രക്ഷപ്പെട്ടു.  

സംഭവത്തില്‍ പോലീസ് കേസെടുത്ത് അന്വേഷണം ആരംഭിച്ചു. അക്രമികൾക്ക് വേണ്ടി തെരച്ചിൽ ഊർജിതമാക്കി.