തൃശൂര്: ചൈല്ഡ്ലൈന് അംഗങ്ങളെ ആക്രമിച്ച് പെണ്കുട്ടിയെ കടത്തിയ സംഭവത്തില് ഒളിവിലായിരുന്ന യുവാവിനെയും പെണ്കുട്ടിയെയും പുതുക്കാട് കണ്ടെത്തി. ഛത്തീസ്ഗഢ് സ്വദേശി ദീപക്കുമാര് സിങാണ് (20) പിടിയിലായത്. ഒപ്പമുള്ള പെണ്കുട്ടിക്ക് രേഖകള് പ്രകാരം 12 വയസാണുള്ളത്. കുപ്പിച്ചില്ല് കൊണ്ടുള്ള ആക്രമണത്തില് ചൈല്ഡ് ലൈന് അംഗത്തിന് പരിക്കേറ്റിരുന്നു.
വ്യാഴാഴ്ച രാവിലെ തൃശൂര് റെയില്വെ സ്റ്റേഷനില് നിന്നാണ് യുവാവ് പെണ്കുട്ടിയെ തട്ടിക്കൊണ്ടുപോയത്. കുട്ടിയെ കൗണ്സിലിങ്ങിനെത്തിച്ച ചൈല്ഡ്ലൈന് ജീവനക്കാരെ ആക്രമിച്ചാണ് പെണ്കുട്ടിയെ തട്ടിക്കൊണ്ടുപോയത്. തൃശൂര്, പാലക്കാട് ജില്ലകള് കേന്ദ്രീകരിച്ചും ഇയാളുടെ ഫോണ് കേന്ദ്രീകരിച്ചും നടത്തിയ അന്വേഷണത്തിലാണ് പുതുക്കാട് നിന്നും ഇരുവരെയും കണ്ടെത്തിയത്. കഴിഞ്ഞദിവസം റെയില്വെ സ്റ്റേഷനില് ഇവരെ സംശയാസ്പദമായ സാഹചര്യത്തില് കണ്ടെത്തിയതിനെത്തുടര്ന്ന് ചൈല്ഡ് ലൈന് പ്രവര്ത്തകര് പെണ്കുട്ടിയെ യുവാവിന്റെ സമീപത്തുനിന്ന് മാറ്റി. പെണ്കുട്ടിയെ ചൈല്ഡ് വെല്ഫെയര് കമ്മിറ്റിക്ക് മുന്നില് ഹാജരാക്കാന് തയ്യാറെടുപ്പ് നടത്തുന്നതിനിടെ ചൈല്ഡ്ലൈന് ഓഫീസിലെത്തിയ യുവാവ് ബിയര് കുപ്പി പൊട്ടിച്ച് ആക്രമിച്ചശേഷമാണ് പെണ്കുട്ടിയെ തട്ടിക്കൊണ്ടുപോയത്.
കുട്ടിയുമായി ട്രെയിനില് കയറിയത് ശ്രദ്ധയില്പ്പെട്ട യാത്രക്കാരില് ചിലര് അപായച്ചങ്ങല വലിച്ച് ട്രെയിന് നിര്ത്തി. ഇതോടെ രണ്ടാമത്തെ പ്ലാറ്റ്ഫോമിലേക്ക് ഇയാള് കുട്ടിയെയും കൊണ്ട് കടക്കുകയായിരുന്നു. ഇവരെ തടയാനായി പോര്ട്ടര്മാര് എത്തി. അതോടെ പൊട്ടിച്ച ബിയര് കുപ്പി കുട്ടിയുടെ കഴുത്തില് വെച്ച് ഭീഷണിപ്പെടുത്തി രക്ഷപ്പെടുകയായിരുന്നു. പിന്നീട് ഇവരെ കണ്ടെത്താനായില്ല. സംഭവത്തില് വീഴ്ച സംഭവിച്ചതിനെത്തുടര്ന്ന് ഒരു ആര്പിഎഫ് ഉദ്യോഗസ്ഥനെ സര്വീസില് നിന്ന് സസ്പെന്ഡ് ചെയ്തിരുന്നു. ബുധനാഴ്ച അര്ധരാത്രിയോടെയാണ് യുവാവും പെണ്കുട്ടിയും തൃശൂര് റെയില്വേ സ്റ്റേഷനിലെത്തുന്നത്. പുലര്ച്ചെ ഒരു യുവാവിനോടൊപ്പം പ്രായപൂര്ത്തിയാകാത്ത പെണ്കുട്ടിയെ കണ്ടതായി റെയില്വേയിലെ ഉദ്യോഗസ്ഥര് ചൈല്ഡ്ലൈന് ഉദ്യോഗസ്ഥരെ അറിയിച്ചു. തുടര്ന്ന് കുട്ടിയെ കണ്ടെത്തി കൗണ്സിലിങ്ങിനായി എത്തിച്ചതായിരുന്നു ഉദ്യോഗസ്ഥര്. അതോടെ യുവാവ് സ്ഥലത്തുനിന്ന് മുങ്ങി.
പിന്നീട് രാവിലെ പത്തുമണിയോടെ ബിയര് ബോട്ടിലുമായി മടങ്ങിയെത്തിയ യുവാവ് ചൈല്ഡ്ലൈന് ഓഫീസില് ഭീകരാന്തരീക്ഷം സൃഷ്ടിച്ച് കുട്ടിയെ തട്ടിക്കൊണ്ടുപോവുകയായിരുന്നു. രാവിലെ 11 മണിക്ക് ശിശു ക്ഷേമ സമിതിയില് ഹാജരാക്കാനിരിക്കെയാണ് റെയില്വേ സ്റ്റേഷന് പ്ലാറ്റ്ഫോമിലെ ചൈല്ഡ് ലൈന് ഓഫീസില്നിന്ന് കുട്ടിയെ യുവാവ് തട്ടിക്കൊണ്ടുപോയത്. കുട്ടിയെ കാണാനില്ലെന്ന് രക്ഷിതാക്കളും പരാതി നല്കിയിട്ടുണ്ട്.
