ചാലക്കുടി: പോക്‌സോ കേസില്‍ കോടതിയില്‍ ഹാജരാകാതെ മുങ്ങിനടന്നിരുന്നയാള്‍ അറസ്റ്റിലായി. ചാലക്കുടി വി.ആര്‍. പുരം സ്വദേശി മോനപ്പിള്ളി അരുണിനെ (33) യാണ് റൂറല്‍ എസ്.പി. ഐശ്വര്യ ഡോംഗ്‌റെയുടെ നിര്‍ദേശപ്രകാരം ഇരിങ്ങാലക്കുട ഡിവൈഎസ്പി ടി.കെ. ഷൈജു, ആളൂര്‍ ഇന്‍സ്‌പെക്ടര്‍ എം.ബി. സിബിന്‍ എന്നിവര്‍ അറസ്റ്റു ചെയ്തത്.
2021 ല്‍ പ്രായപൂര്‍ത്തിയാകാത്ത പെണ്‍കുട്ടിയെ കൂട്ട ബലാല്‍സംഗത്തിന് ഇരയാക്കിയ സംഭവത്തിലും ഇയാള്‍ പ്രതിയാണ്. ഇയാള്‍ ഉള്‍പ്പെടെ നിരവധി പേര്‍ പ്രതികളായ സംഭവത്തില്‍ പതിനാലോളം കേസുകളാണ് അന്ന് രജിസ്റ്റര്‍ ചെയ്തിരുന്നത്. ജാമ്യത്തിലിറങ്ങി കോടതിയില്‍ ഹാജരാകാതെ മുങ്ങിനടക്കുകയായിരുന്ന ഇയാള്‍ക്കെതിരെ ചാലക്കുടി ഫാസ്റ്റ് ട്രാക്ക് പോക്‌സോ കോടതി അറസ്റ്റ് വാറണ്ട് പുറപ്പെടുവിച്ചിരുന്നു. അറസ്റ്റു ചെയ്തു കോടതിയില്‍ ഹാജരാക്കിയ ഇയാളെ റിമാന്റ് ചെയ്തു.
ചാലക്കുടി സ്റ്റേഷനില്‍ അടിപിടി കേസിലും പ്രതിയായിരുന്നു. സീനിയര്‍ സിപിഒ മാരായ പി.കെ. മനോജ്, ഇ.എസ്. ജീവന്‍, പി.എ. ഡാനി, സിപിഒ മാരായ കെ.എസ്. ഉമേഷ്, കെ.എസ്. ബിലഹരി എന്നിവരാണ് പ്രതിയെ പിടികൂടിയ സംഘത്തില്‍ ഉണ്ടായിരുന്നത്.
പ്രതികരിക്കാൻ ഇവിടെ എഴുതുക: