ഇടുക്കി: കെഎസ്ആര്ടിസി ബസില് നഗ്നതാ പ്രദര്ശനം നടത്തിയ വ്യക്തി പിടിയില്. തൃശ്ശൂര് കൊടകര സ്വദേശി സിജു (38) ആണ് ഇടുക്കി തങ്കമണി പോലീസ് അറസ്റ്റു ചെയ്തത്. എറണാകുളത്തു നിന്നും കുമളിയിലേക്ക് പോയ കെഎസ്ആര്ടിസി ബസിലാണ് സംഭവം.
തൃശ്ശൂര് സ്വദേശിയായ സിജു പെരുമ്പാവൂരില് നിന്നാണ് ബസില് കയറിയത്. കട്ടപ്പനയിലെ റിക്രൂട്ടിംഗ് എജന്സിയിലേക്ക് വന്നതായിരുന്നു സിജു. യുവതി ഈ സമയം ബസിലുണ്ടായിരുന്നുവെന്നാണ് റിപ്പോര്ട്ട്. നേര്യമംഗലം കഴിഞ്ഞപ്പോള് യുവതി ഇരുന്ന സീറ്റിലുണ്ടായിരുന്നവര് ഇറങ്ങി. തുടര്ന്ന് പെണ്കുട്ടിക്ക് സമീപം സിജു വന്നിരിക്കുകയായിരുന്നു.
തങ്കമണിക്ക് സമീപം പാണ്ടിപ്പാറയിലെത്തിയപ്പോള് ഇയാള് നഗ്നത പ്രദര്ശനം നടത്തിയെന്നാണ് പെണ്കുട്ടിയുടെ പരാതി. പെണ്കുട്ടി ഇത് ചോദ്യം ചെയ്തു. ബഹളം കേട്ട് ബസ് ജീവനക്കാരും സഹയാത്രികരുമിടപെട്ടതിനെ തുടര്ന്ന് ബസ് തങ്കമണി പോലീസ് സ്റ്റേഷനിലെത്തിച്ചു. പെണ്കുട്ടിയുടെ മൊഴി എടുത്ത ശേഷം സിജുവിനെ ചോദ്യം ചെയ്തു. ഇതിനു ശേഷമാണ് അറസ്റ്റ് രേഖപ്പെടുത്തിയത്.
അതേസമയം നഗ്നത പ്രദര്ശനം നടത്തിയിട്ടില്ലെന്നാണ് ഇയാള് മൊഴി നല്കിയത്. നഗ്നത പ്രദര്ശനം നടത്തിയതിനുള്പ്പെടെയുള്ള വകുപ്പുകള് ചുമത്തിയാണ് സിജുവിനെതിരെ കേസെടുത്തിരിക്കുന്നത്. മാസങ്ങള്ക്കു മുമ്പ് സമാനമായ സംഭവം കെഎസ്ആര്ടിസി ബസില് നടന്നത് മാധ്യമ ശ്രദ്ധനേടിയിരുന്നു.
