കാഞ്ഞാണി: അരിമ്പൂര്‍ സ്വദേശിയെ കള്ളുഷാപ്പിന് മുന്നിലിട്ട് വെട്ടിക്കൊലപ്പെടുത്താന്‍ ശ്രമിച്ച കേസിലെ പ്രതിയായ കുട്ടിപ്പ്രിന്‍സ് എന്ന പ്രിന്‍സിനെ അന്തിക്കാട് പോലീസ് അറസ്റ്റ് ചെയ്തു. നിരവധി കൊലപാതക ശ്രമ കേസുകളില്‍ പ്രതിയായ ഇയാള്‍ കുപ്രസിദ്ധ ഗുണ്ട, കടവി രഞ്ജിത്തിന്റെ കൂട്ടാളിയാണ്.
പോലീസ് ഉദ്യോഗസ്ഥന്റെ വീട്ടില്‍ ബോംബെറിഞ്ഞ കേസിലും ഇയാള്‍ പ്രതിയാണ്. ജൂണ്‍ 21 ന് രാത്രി അരിമ്പൂര്‍ കുന്നത്തങ്ങാടിയിലെ ഹില്‍ടോപ്പ് ബാറിന് സമീപമാണ് കേസിനാസ്പദമായ സംഭവം നടന്നത്. ബാറിന് എതിര്‍വശത്തുള്ള റോഡിനോട് ചേര്‍ന്ന് കള്ളുഷാപ്പിന് മുന്നില്‍ വച്ച് മനക്കൊടി സ്വദേശി വിപിന്‍ എന്നയാളെ പ്രിന്‍സ് വെട്ടിക്കൊലപ്പെടുത്താന്‍ ശ്രമിച്ചു. ഇരുവരും തമ്മിലുള്ള വ്യക്തി വൈരാഗ്യമാണ് കൊലപാതകശ്രമത്തില്‍ കലാശിച്ചത്. തുടര്‍ന്ന് ഇയാള്‍ ഒളിവില്‍ പോവുകയായിരുന്നു.
അന്തിക്കാട് പോലീസ് സ്റ്റേഷനിലെ റൗഡി ലിസ്റ്റില്‍ ഉള്ളയാളാണ് അറസ്റ്റിലായ പ്രിന്‍സ്. 19 ഓളം കേസുകളില്‍ ഇയാള്‍ പ്രതിയാണെന്ന് പോലീസ് പറഞ്ഞു. പോലീസ് ഉദ്യോഗസ്ഥന്റെ വീട്ടിലെത്തി ബോംബെറിഞ്ഞ ശേഷം ആക്രമിക്കാന്‍ ശ്രമിച്ച കേസും ഇയാള്‍ക്കെതിരെയുണ്ട്. നിരവധി കൊലപാതക ശ്രമങ്ങളും പിടിച്ചുപറി കേസുകളുമാണ് പ്രിന്‍സിനെതിരെ പോലീസില്‍ ഉള്ളത്. കുപ്രസിദ്ധ ഗുണ്ട കടവി രഞ്ജിത്തിന്റെ കൂട്ടാളിയുമാണ് ഇയാള്‍. അന്തിക്കാട് പോലീസും ജില്ലാ പോലീസ് മേധാവിയുടെ കീഴിലുള്ള സ്പെഷല്‍ സ്‌ക്വാഡും ചേര്‍ന്നാണ് പ്രതിയെ പിടികൂടിയത്. അന്തിക്കാട് എസ്എച്ച്ഒ പി.കെ. ദാസ്, എസ്‌ഐ എ. ഹബീബ്, ഡാന്‍സാഫ് എസ്‌ഐ ജയകൃഷ്ണന്‍, എഎസ്‌ഐമാരായ എ. ഷൈന്‍, ജോസി ജോസ്, എസ്‌സിപിഒ മാരായ സൂരജ് വി. ദേവ്, മിഥുന്‍ കൃഷ്ണ, ജീവന്‍ എന്നിവരടങ്ങിയ സംഘമാണ് പ്രതിയെ പിടികൂടിയത്.
പ്രതികരിക്കാൻ ഇവിടെ എഴുതുക: