തൃശൂര്: ഡോക്ടേഴ്സ് ദിനത്തില് തൃശൂര് മെഡിക്കല് കോളേജില് നിന്നൊരു സന്നദ്ധ സേവനത്തിന്റെ കരുതല് മാതൃക. ഇരിങ്ങാലക്കുടയിലുള്ള വീട്ടില് നിന്നും മെഡിക്കല് കോളേജിലേക്ക് രാവിലെ ജോലിക്കായി സ്വകാര്യ ബസില് വരികയായിരുന്നു ഡോ രാജേഷ്. ബസ് യാത്രക്കിടെ ഒരാള് കുഴഞ്ഞ് വീഴുന്നത് ശ്രദ്ധയില് പെട്ടു. ഉടന് പ്രഥമശുശ്രൂഷ നല്കി, തൃശൂര് ജനറല് ആശുപത്രിയിലും തുടര്ന്ന് മെഡി. കോളേജിലും എത്തിച്ച് ജീവന് രക്ഷിച്ചു. തൃശൂര് മെഡി. കോളേജിലെ ഇന്ഫെക്ഷ്യസ് ഡിസീസസ് വിഭാഗം അസോസിയേറ്റ് പ്രൊഫസറാണ് ഡോ. കെ.ആര്. രാജേഷ്.
ബസ് അശ്വിനി ആശുപത്രി കഴിഞ്ഞപ്പോഴാണ് ഒരാള് ബസില് കുഴഞ്ഞുവീഴുന്നത് ഡോക്ടറുടെ ശ്രദ്ധയില്പ്പെട്ടത്. എന്തു ചെയ്യണമെന്നറിയാതെ യാത്രക്കാരും ജീവനക്കാരും പരിഭ്രമിച്ചപ്പോള് ഡോക്ടര് മുന്നോട്ട് വന്ന് രോഗിയുടെ പള്സ് പരിശോധിച്ചു. കാര്ഡിയാക് അറസ്റ്റാണെന്ന് മനസിലാക്കി സിപിആര് നല്കി. ബസില് നിന്നും യാത്രക്കാരെ ഇറക്കി.
രോഗിയുടെ കൂടെയുണ്ടായിരുന്ന ബന്ധുവിനൊപ്പം ഡോക്ടറും ചേര്ന്ന് ജനറല് ആശുപത്രിയിലെത്തിച്ചു. രോഗി അബോധാവസ്ഥയിലും പള്സ് ഇല്ലാത്ത അവസ്ഥയിലുമായിരുന്നു. യാത്രയിലുടനീളം ഡോക്ടര് സിപിആര് നല്കിക്കൊണ്ടിരുന്നു. ഡോക്ടര് തന്നെ അത്യാഹിത വിഭാഗത്തില് രോഗിയെ പ്രവേശിപ്പിച്ച് അടിയന്തര ചികിത്സ നല്കി. ഡ്യൂട്ടി ആര്എംഒയും മറ്റ് ഡോക്ടര്മാരും ചേര്ന്ന് രോഗിയെ വെന്റിലേറ്ററില് പ്രവേശിപ്പിക്കാനുള്ള നടപടികള് എടുത്തു. അപ്പോഴേക്കും രോഗിക്ക് ബോധം വരികയും ശരീരം പ്രതികരിച്ച് തുടങ്ങുകയും ചെയ്തു. നില മെച്ചപ്പെട്ട ശേഷം ആംബുലന്സില് കയറ്റി ഡോക്ടര് തന്നെ രോഗിയെ തൃശൂര് മെഡിക്കല് കോളേജിലെത്തിച്ചു. എമര്ജന്സി വിഭാഗത്തിലെത്തിച്ച് വിദഗ്ധ ചികിത്സ നല്കി.
ചേര്പ്പ് സ്വദേശി രഘുവിനാണ് (59) ഡോക്ടര് തുണയായത്. മുമ്പും ഹൃദയാഘാതം വന്നയാളാണ് രോഗി. മെഡിക്കല് കോളേജില് ചികിത്സക്കായി പോകുന്ന വഴിയായിരുന്നു കുഴഞ്ഞുവീണത്. കൃത്യസമയത്ത് സിപിആര് നല്കി ആശുപത്രിയിലെത്തിക്കാനായത് മൂലം ജീവന് രക്ഷിക്കാനായി. ഡോക്ടര്ക്കൊപ്പം നിന്ന ബസ് ജീവനക്കാരുടെ പ്രവര്ത്തനവും മാതൃകാപരമാണ്. രഘുവിന്റെ ആരോഗ്യനില തൃപ്തികരമാണെന്ന് ആശുപത്രി സൂപ്രണ്ടിന്റെ ചുമതലയുള്ള ഡോ. നിഷ എം. ദാസ് അറിയിച്ചു. മാതൃകാപരമായ പ്രവര്ത്തനം നടത്തി രോഗിയുടെ ജീവന് രക്ഷിച്ച ഡോ. രാജേഷിനെ ആരോഗ്യ വകുപ്പ് മന്ത്രി വീണാ ജോര്ജ് അഭിനന്ദിച്ചു.
