ലണ്ടന്: വിംബിള്ഡന് ടെന്നിസില് കാര്ലോസ് അല്കരാസും ഇഗ ഷ്യാങ്ടെക്കും ഒന്നാം സീഡ് താരങ്ങള്. ദിവസങ്ങള്ക്ക് മുമ്പ് ആദ്യമായി പുല്ത്തകിടി കോര്ട്ടില് കിരീടം നേടിയ അല്കരാസ് പുരുഷ ടെന്നിസ് റാങ്കിങ്ങില് ഒന്നാം സ്ഥാനത്തേക്കെത്തിയിരുന്നു. ക്വീന്സ് ക്ലബ്ബ് ടൈറ്റിലാണ് തിങ്കളാഴ്ച താരം സ്വന്തമാക്കിയത്.
ഫ്രഞ്ച് ഓപ്പണ് ടൈറ്റിലോടെ ഗ്രാന്ഡ് സ്ലാം നേട്ടത്തില് റെക്കോഡിട്ട നോവാക് ദ്യോക്കോവിച്ച് ആണ് പുരുഷ സിംഗിള്സിലെ രണ്ടാം സീഡ് താരം. വിംബിള്ഡന് കൂടി നേടാനായാല് മറ്റൊരു റെക്കോഡ് നേട്ടം കൂടി 36കാരനായ ദ്യോക്കോവിച് സ്വന്തമാക്കും. ഏറ്റവും കൂടുതല് വിംബിള്ഡന് നേടിയിട്ടുള്ള ഇതിഹാസ താരം റോജര് ഫെഡറര്ക്ക് ഒപ്പമെത്താകും. എട്ട് വിംബിള്ഡന് ടൈറ്റിലുകളാണ് ഫെഡറര് നേടിയിട്ടുള്ളത്.
20കാരനായ സ്പാനിഷ് താരം അല്കരാസിന്റെ മൂന്നാം വിംബിള്ഡനാണ് തിങ്കളാഴ്ച ആരംഭിക്കുന്നത്. 2021ല് തന്റെ ആദ്യ ടൂര്ണമെന്റില് താരം റണ്ടാം റൗണ്ട് കടന്നു. കഴിഞ്ഞ വര്ഷം നാലാം റൗണ്ട് വരെ മുന്നേറിയശേഷം പുറത്തായി.
പുരുഷ സിംഗിള്സില് ദാനില് മെദ്വെദെവ് ആണ് മൂന്നാം സീഡ് താരം. ഫ്രഞ്ച് ഓപ്പണ് ഫൈനലിസ്റ്റായ നോര്വേ താരം കാസ്പര് റൂഡ് ആണ് നാലാം സീഡിലുള്ളത്.
