മലപ്പുറം: ഏകീകൃത സിവില് കോഡിനെ ശക്തിയുക്തം എതിര്ക്കുമെന്ന് മുസ്ലീം ലീഗ്. ഏകീകൃത സിവില് കോഡിനെ നിയമപരമായും രാഷ്ട്രീയ പരമായി എതിര്ക്കുമെന്നും നടപ്പാക്കിയാല് പ്രത്യാഘാതം വലുതായിരിക്കുമെന്നും മുസ്ലീം ലീഗ് നേതാക്കള് പ്രതികരിച്ചു. ബിജെപി തെരഞ്ഞെടുപ്പു കാലത്ത് അജണ്ട സെറ്റ് ചെയ്യുകയാണെന്നു അടിയന്തര യോഗത്തിനു ശേഷം ലീഗ് നേതാക്കള് പറഞ്ഞു.
ഇന്ത്യന് സാഹചര്യത്തില് ഒരിക്കലും ഇത് നാടപ്പാക്കാനാവില്ലെന്നും യഥാര്ഥ പ്രശ്നത്തില് നിന്നും ശ്രദ്ധതിരിക്കാനാണ് കേന്ദ്രത്തിന്റെ ശ്രമമെന്നും പറഞ്ഞ നേതാക്കള് പ്രതിപക്ഷ ഐക്യം പ്രധാനമന്ത്രിയെ ഭയപ്പെടുത്തുന്നുവെന്നും കുറ്റപ്പെടുത്തി. ഇതുമായി ബന്ധപ്പെട്ട കൂടുതല് തീരുമാനങ്ങള് ഈ മാസം 30 ന് ചേരുന്ന ദേശീയ എക്സിക്യൂട്ടീവ് യോഗത്തില് തീരുമാനിക്കുമെന്ന് പി കെ കുഞ്ഞാലിക്കുട്ടി അറിയിച്ചു. ഇക്കാര്യത്തില് പ്രതിപക്ഷ പിന്തുണ ഉണ്ടാകുമെന്നാണ് പ്രതീക്ഷിക്കുന്നതെന്നും നേതാക്കള് മാധ്യമങ്ങളോട് പ്രതികരിച്ചു.
