സ്വാതന്ത്ര്യത്തെ ആര്‍പ്പുവിളിച്ച് വരവേറ്റയാള്‍, ഗാന്ധിജിയും ഹിമാലയവും അത്രമേല്‍ പ്രിയം

തൃശൂര്‍: ബ്രിട്ടീഷ് ഭരണത്തില്‍ നിന്ന് ഇന്ത്യ സ്വതന്ത്രമായ ദിനത്തില്‍ കൂട്ടുകാരോടൊത്ത് അര്‍ദ്ധരാത്രിയില്‍ ‘ആര്‍പ്പോ’ വിളിച്ച് ആഹ്ലാദം പങ്കിട്ടതിന്റെ ഓര്‍മ്മ കാണാനെത്തുന്നവരോട് ആവേശപൂര്‍വ്വം പങ്ക്‌വെക്കുമായിരുന്നു പി. ചിത്രന്‍ നമ്പൂതിരിപ്പാട്. 100 വയസ് പിന്നിട്ടപ്പോഴും ആ ഓര്‍മ്മകള്‍ക്ക് ഇന്നലെയെന്നപോലെ തിളക്കമുണ്ടായിരുന്നു.  

ബ്രിട്ടീഷുകാരില്‍ നിന്ന് ഇന്ത്യ സ്വാതന്ത്ര്യം നേടുമ്പോള്‍ ചിത്രന്‍ നമ്പൂതിരിപ്പാടിന് 25 വയസ്. മദ്രാസില്‍ നിന്ന് പഠനം കഴിഞ്ഞ് തിരിച്ചെത്തി ജന്മനാടായ മലപ്പുറം മുക്കുതലയില്‍ തുടങ്ങിയ സ്വന്തം സ്‌കൂളില്‍ മാനേജരും അധ്യാപകനുമായി പ്രവര്‍ത്തിക്കുന്ന കാലം. ഇന്ത്യ സ്വതന്ത്രമാകുമെന്നുള്ള വാര്‍ത്ത പ്രചരിച്ചതിനെത്തുടര്‍ന്ന് 1947 ആഗസ്ത് 14 ന് രാത്രിയില്‍ കൂട്ടുകാരോടൊപ്പം നാട്ടിലെ വായനശാലയില്‍ പെട്രോമാക്സ് കത്തിച്ച് വച്ച് ഒത്തുകൂടി. ‘ഉറങ്ങിക്കിടക്കുന്ന രാഷ്‌ട്രം ഉണരുന്നു’ എന്നുള്ള പണ്ഡിറ്റ് ജവഹര്‍ലാല്‍ നെഹ്റുവിന്റെ പ്രസംഗം രാത്രി 12 മണിക്ക് റേഡിയോയില്‍ കേട്ടു. നെഹ്റുവിന്റെ പ്രസംഗം കഴിഞ്ഞ ഉടനെ  50 ഓളം പേരടങ്ങിയ യുവാക്കള്‍ റോഡിലിറങ്ങി ‘ആര്‍പ്പ്’ വിളിച്ച് സന്തോഷം പങ്കിട്ടു. ശബ്ദം കേട്ട് പരിസരവാസികളെല്ലാം കാര്യമറിയാതെ ഉണര്‍ന്നു. നമ്പൂതിരി വീടുകളില്‍ ആണ്‍കുട്ടി പിറന്നതിന്റെ ആഹ്ലാദമാകും ‘ആര്‍പ്പോ’ വിളിയെന്നാണ് ചിലര്‍ കരുതിയത്.  

ഗാന്ധിജിയുടെ ചിതാഭസ്മം കേരളത്തിലേക്ക് കൊണ്ടുവന്നപ്പോള്‍ അത് ഏറ്റുവാങ്ങാന്‍ ഭാഗ്യം ലഭിച്ചതും ചിത്രന്‍ നമ്പൂതിരിപ്പാടിനായിരുന്നു. തിരുനാവായയില്‍ നിമജ്ജനം ചെയ്യാനാണ് കെ. കേളപ്പന്റെ നേതൃത്വത്തില്‍ ചിതാഭസ്മം കൊണ്ടുവന്നത്. നിമജ്ജനം കാണാന്‍ ചിത്രന്‍ നമ്പൂതിരിപ്പാടടക്കം 100 പേര്‍ പ്രത്യേകം ബസ് വിളിച്ച് പോയി. ചിതാഭസ്മവുമായെത്തിയ സമയത്ത് കേളപ്പജിയെ മാലയിട്ട് സ്വീകരിക്കാന്‍ നിശ്ചയിച്ചിരുന്നയാളെ സ്ഥലത്ത് കണ്ടില്ല. അവിടെയുണ്ടായിരുന്ന നേതാക്കളും മറ്റും കേളപ്പജിയെ ഹാരമണിയിച്ച് ചിതാഭസ്മം ഏറ്റുവാങ്ങാന്‍ നമ്പൂതിരിപ്പാടിനോട് പറഞ്ഞു. നിനച്ചിരിക്കാതെ വന്നുചേര്‍ന്ന ഭാഗ്യമെന്നാണ് എന്നും ഗാന്ധിജിയുടെ ആരാധകനായി ജീവിച്ച ചിത്രന്‍ നമ്പൂതിരിപ്പാടിന് ഇതേക്കുറിച്ച് പറയാനുണ്ടായിരുന്നത്. പിന്നീട് ഗാന്ധിജിയുടെ ചിതാഭസ്മം ശിരസിലേറ്റി നിമജ്ജന സ്ഥലത്ത് കൊണ്ടുപോയി പ്രതിഷ്ഠിച്ചു. ഗാന്ധിജിയെയും കെ. കേളപ്പനെയും പറ്റി പറയുമ്പോള്‍ ആ കണ്ണുകള്‍ ഈറനണിഞ്ഞ് തിളങ്ങുമായിരുന്നു. ചിത്രന്‍ നമ്പൂതിരിപ്പാടിനെ അത്രമേല്‍ ആകര്‍ഷിച്ചത് ഗാന്ധിജിയും ഹിമാലയവും ആയിരുന്നു. 30 തവണ ഹിമാലയ യാത്ര നടത്തിയിട്ടുള്ള ചിത്രന്‍ നമ്പൂതിരിപ്പാട് ഇനിയും ഹിമാലയത്തില്‍ പോകണമെന്ന്  ആഗ്രഹിച്ചിരുന്നു. തപോവനസ്വാമികളുടെ ഹിമഗിരി വിഹാരമാണ് നമ്പൂതിരിപ്പാടിനെ ഹിമാലയത്തിലേക്ക് ആകര്‍ഷിച്ചത്. ഇന്ത്യയുടെ സാംസ്‌കാരിക പൈതൃകത്തിന് ഹിമാലയം വലിയ സംഭാവനകള്‍ നല്‍കിയിട്ടുണ്ടെന്ന് അദ്ദേഹം എപ്പോഴും പറയുമായിരുന്നു. കേദാറിലും ബദരിയിലും നിരവധി തവണ പോയിട്ടുള്ള ചിത്രന്‍ നമ്പൂതിരിപ്പാട് അവിടെയുള്ള വ്യാസ ഗുഹയില്‍ ഇരുന്ന് വ്യാസരചനകള്‍ വായിക്കുക പതിവായിരുന്നു.  

 വലിയ സംഘത്തോടൊപ്പമാണ് എപ്പോഴും യാത്ര. കൂടെയുള്ളവര്‍ക്ക് ഹിമാലയത്തിന്റെ മഹത്വം, വ്യാസന്റെ കഥകള്‍, ഇന്ത്യന്‍ സംസ്‌കാരം, ചരിത്രം എല്ലാം വിശദീകരിച്ച് പറഞ്ഞുകൊടുക്കും. ചിത്രന്‍ നമ്പൂതിരിപ്പാടിനൊപ്പം ഹിമാലയ യാത്ര ചെയ്യാന്‍ കഴിഞ്ഞത് ഭാഗ്യമായാണ് പലരും കരുതുന്നത്. 30 തവണയും വ്യത്യസ്തങ്ങളായ അനുഭവമാണ് ഹിമാലയത്തില്‍ തനിക്ക് ഉണ്ടായതെന്ന് അദ്ദേഹം പറയുമായിരുന്നു. ഹിമാലയത്തെപ്പോലെ തന്നെ ചിത്രനെ ആകര്‍ഷിച്ച ഔന്നത്യമായിരുന്നു മഹാത്മാഗാന്ധി. ഖദര്‍ ധാരണം, ലളിതമായ ജീവിതം തുടങ്ങിയവയൊക്കെ വാര്‍ധക്യത്തിലും അദ്ദേഹം അനുവര്‍ത്തിച്ചിരുന്നു.