ചെറുതുരുത്തി: പൈങ്കുളത്ത് പേപ്പട്ടിയുടെ കടിയേറ്റ് അഞ്ചോളം പേര്‍ക്ക് പരുക്ക്. പൈങ്കുളം കിളിയം പറമ്പില്‍ കേശവന്‍, പുത്തന്‍വീട്ടില്‍ സത്യഭാമ, വെള്ളാത്ത് ഉഷാകുമാരി, പുത്തന്‍പുരയ്‌ക്കല്‍ പ്രവീണ്‍ എന്നിവര്‍ക്കാണ് ഇന്നലെ പേപ്പട്ടിയുടെ കടിയേറ്റത്. കഴിഞ്ഞദിവസം പൈങ്കുളം റെയില്‍വേ ഗേറ്റിന് സമീപത്ത് വെച്ച് അബ്ദുള്‍ ലത്തിഫ് എന്നയാള്‍ക്കും പട്ടിയുടെ കടിയേറ്റിരുന്നു. റോഡിലൂടെ നടന്നു പോവുകയായിരുന്ന ഇവരെ പേപ്പട്ടി ഓടി വന്ന് കടിക്കുകയായിരുന്നു. കടിയേറ്റവര്‍ മെഡിക്കല്‍ കോളജ് ആശുപത്രിയില്‍ ചികിത്സ തേടി. എല്ലാവരെയും കടിച്ചത് ഒരേ പട്ടിയാണെന്ന നിഗമനത്തിലാണ് നാട്ടുകാര്‍.
പട്ടിയെ പിടികൂടാനായി നാട്ടുകാരുടെ നേതൃത്വത്തില്‍ തിരച്ചില്‍ ആരംഭിച്ചെങ്കിലും രാത്രിയായതിനാല്‍ കണ്ടെത്താന്‍ കഴിഞ്ഞില്ല. പലരും ഭാഗ്യം കൊണ്ടാണ് ഇതിന്റെ കടിയേല്‍ക്കാതെ രക്ഷപ്പെട്ടത്. പ്രദേശത്തെ നിരവധി തെരുവ് നായ്‌ക്കള്‍ക്കും ഇതേ പട്ടിയുടെ കടിയേറ്റതായി സംശയിക്കുന്നതായും, അധികൃതര്‍ എത്രയും പെട്ടെന്ന് ഇതിന് പരിഹാരം കാണണമെന്നും നാട്ടുകാര്‍ ആവശ്യപ്പെട്ടു.
പ്രതികരിക്കാൻ ഇവിടെ എഴുതുക: