തിരുവനന്തപുരം : ലൈഫ് മിഷന്‍ കരാര്‍ അട്ടിമറിച്ചത് മുഖ്യമന്ത്രിയുടെ സാന്നിധ്യത്തില്‍ ക്ലിഫ് ഹൗസില്‍ വെച്ച് നടന്ന യോഗത്തില്‍. പദ്ധതിയുമായി ബന്ധപ്പെട്ട പ്രാഥമിക ചര്‍ച്ചകളെല്ലാം മുഖ്യമന്ത്രിയുടെ ഔദ്യോഗിക വസതിയിലാണ് നടന്നതെന്ന് സ്വപ്ന സുരേഷ്. എന്‍ഫോഴ്‌സ്‌മെന്റ് ഡയറക്ടറേറ്റ് കോടതിയില്‍ സമര്‍പ്പിച്ച കുറ്റപത്രത്തിലാണ് ഇക്കാര്യം വ്യക്തമാക്കുന്നത്.
ലൈഫ് മിഷനുമായി ബന്ധപ്പെട്ട ചര്‍ച്ചകളെല്ലാം മുഖ്യമന്ത്രിയുടെ സാന്നിധ്യത്തിലാണ് നടന്നിട്ടുള്ളത്. വലിയ കമ്മീഷന്‍ മുന്നില്‍ക്കണ്ട് എല്ലാ ജില്ലകളിലും ലൈഫ് പദ്ധതിക്ക് വിദേശ പണം എത്തിക്കാന്‍ കോണ്‍സല്‍ ജനറല്‍ അടക്കമുള്ളവര്‍ ആലോചിച്ചിരുന്നെന്നാണ് ഇതില്‍ ആരോപിക്കുന്നത്. കോണ്‍സല്‍ ജനറലും മുഖ്യമന്ത്രിയുടെ പ്രിന്‍സിപ്പല്‍ സെക്രട്ടറിയായിരുന്ന എം. ശിവശങ്കറും താനും ഈ ചര്‍ച്ചകളില്‍ പങ്കെടുത്തു.
2019ലാണ് പദ്ധതിക്കായുള്ള ധാരണാപത്രം ഒപ്പുവെക്കുന്നത്. പദ്ധതി നിര്‍വഹണ ചുമതല പൂര്‍ണമായും സംസ്ഥാന സര്‍ക്കാരിനായിരിക്കും എന്നതായിരുന്നു ധാരണാപത്രത്തില്‍ പറഞ്ഞിരുന്നത്. കരാറുകാരെ കണ്ടെത്തുന്നതും നിര്‍മാണ പൂര്‍ത്തീകരണവും അടക്കം എല്ലാം സര്‍ക്കാരിന്റെ മേല്‍നോട്ടത്തിലായിരിക്കും.
വടക്കാഞ്ചേരി ഫ്‌ളാറ്റ് സമുച്ചയത്തിനൊപ്പം അമ്മമാര്‍ക്കും കുട്ടികള്‍ക്കും വേണ്ടിയുള്ള ആശുപത്രി കൂടി പണിയാനായിരുന്നു തീരുമാനം. റെഡ് ക്രസന്റ് നല്‍കുന്ന പണം സര്‍ക്കാര്‍ ഏജന്‍സികള്‍ക്ക് കൈമാറുക എന്നത് മാത്രമായിരുന്നു യുഎഇ കോണ്‍സുലേറ്റിന്റെ ചുമതല. എന്നാല്‍ ധാരണാപത്രം ഒപ്പിട്ടതിന്റെ പിറ്റേന്ന് മുഖ്യമന്ത്രിയുടെ വസതിയില്‍ രാത്രി 7.30 ന് സ്വകാര്യയോഗം ചേര്‍ന്നിരുന്നു. ഇതില്‍ ധാരണാപത്രം അട്ടിമറിച്ച് ടെന്‍ഡര്‍ പോലും വിളിക്കാതെ കരാറുകാരെ തെരഞ്ഞെടുക്കാന്‍ കോണ്‍സല്‍ ജനറലിനെ ചുമതലപ്പെടുത്തുകയായിരുന്നു. കോണ്‍സല്‍ ജനറല്‍ അടക്കമുള്ളവര്‍ക്ക് പദ്ധതിയില്‍ നിന്നുള്ള കമ്മിഷന്‍ അടിച്ചുമാറ്റായിരുന്നു ഇത്.
മുഖ്യമന്ത്രിയുടെ അറിവോടെയാണ് ധാരണാപത്രത്തില്‍ മാറ്റം കൊണ്ടുവന്നത്. കേരളത്തിലെ സംവിധാനമനുസരിച്ച് പദ്ധതി നിര്‍വഹണച്ചുമതല സര്‍ക്കാര്‍ ഏറ്റെടുത്താല്‍ കോണ്‍സല്‍ ജനറല്‍ അടക്കമുള്ളവര്‍ക്ക് കമ്മിഷന്‍ കിട്ടില്ലെന്ന് മുഖ്യമന്ത്രി പറഞ്ഞതായും സ്വപ്ന കുറ്റപത്രത്തില്‍ ആരോപിക്കുന്നുണ്ട്.
പ്രതികരിക്കാൻ ഇവിടെ എഴുതുക: