തിരുവനന്തപുരം: വടകര തപാല് ഓഫീസ് അക്രമിച്ചതുമായ ബന്ധപ്പെട്ട കേസില് മൂന്ന് ലക്ഷത്തി എണ്പതിനായിരം രൂപ നഷ്ടപരിഹാരം കെട്ടിവെച്ച മന്ത്രി മുഹമ്മദ് റിയാസ് രാജിവെക്കണമെന്ന് ബിജെപി സംസ്ഥാന അദ്ധ്യക്ഷന് കെ.സുരേന്ദ്രന്. പൊതുമുതല് നശിപ്പിച്ച കേസില് പൊതുമരാമത്ത് മന്ത്രി നഷ്ടപരിഹാരം കെട്ടിവെച്ചത് കേരളത്തിന് അപമാനമാണ്. പൊതുമുതല് സംരക്ഷിക്കുമെന്ന് സത്യപ്രതിജ്ഞ ചെയ്ത മന്ത്രിയാണ് കേന്ദ്രസര്ക്കാരിന്റെ ഒരു ലക്ഷത്തി ഇരുപതിനായിരം രൂപയുടെ കിയോസ്ക്ക് നശിപ്പിച്ചത്.
പൊതുജനങ്ങള്ക്ക് ഉപകാരപ്രദമാവുന്ന സംവിധാനമാണ് അന്നത്തെ ഡിവൈഎഫ്ഐ നേതാവായിരുന്ന റിയാസ് നശിപ്പിച്ചത്. പിഡിപിപി ചുമത്തപ്പെട്ട മുഹമ്മദ് റിയാസ് പൊലീസ് ഉള്പ്പെടെയുള്ളവരെ ഭരണസംവിധാനം ഉപയോഗിച്ച് കൂറുമാറ്റിയാണ് ക്രിമിനല് കേസില് നിന്നും രക്ഷപ്പെട്ടത്. ഇത് അധികാര ദുര്വിനിയോഗമാണ്. ക്രിമിനല് കേസ് നിലനിന്നിരുന്നെങ്കില് മുഹമ്മദ് റിയാസ് അയോഗ്യനാവുമായിരുന്നു. റിയാസ് കുറ്റം സമ്മതിച്ച സ്ഥിതിക്ക് ക്രിമിനല് കേസ് റീട്രയല് നടത്തണം. പ്രോസിക്യൂഷന് മനപൂര്വ്വം പരാജയപ്പെട്ടത് സര്ക്കാരിന്റെ അധികാര ദുര്വിനിയോഗം നടത്തിയതിന്റെ പ്രത്യക്ഷ ഉദാഹരണമാണ്. മുഹമ്മദ് റിയാസിന് മന്ത്രിയായി തുടരാനുള്ള ധാര്മ്മിക അവകാശമില്ലെന്നും കെ.സുരേന്ദ്രന് പറഞ്ഞു.
