രഞ്ജിന് രാജ് എന്ന സംഗീത സംവിധായകന്‍ സിനിമ ഗാനാസ്വാദകരുടെ ഇടയില്‍ ശ്രദ്ധിക്കപ്പെടാന്‍ തുടങ്ങുന്നത് ജോസഫ് എന്ന സിനിമ മുതല്‍ ആണ്… ജോസഫില്‍ തുടങ്ങി ഈ അടുത്ത് വന്ന മാളികപ്പുറം വരെ, ഒരു പിടി ജനപ്രീതി ആര്‍ജിച്ച ഗാനങ്ങള്‍ ചെയ്യാന്‍ രഞ്ജിന് സാധിച്ചിട്ടുണ്ട്. ഇതേ സംഗീത സംവിധായകന്റെ ഏറ്റവും പുതിയ റീലീസ് ആണ് ‘കുഞ്ഞമ്മിണിസ് ഹോസ്പിറ്റല്‍’ എന്ന ചിത്രത്തില്‍നിന്ന് പുറത്തുവന്നിരിക്കുന്ന ‘ആകാശത്തല്ല’ എന്ന ഗാനം…
യു ട്യൂബില്‍ ശ്രദ്ധ നേടുന്ന ഈ ഗാനത്തിന് പിന്നില്‍ ഒരുപിടി പ്രത്യേകതകള്‍ ഉണ്ട്. പല തലമുറയില്‍പ്പെട്ട ഗായകര്‍ ആണ് ഈ ഗാനത്തിന് പിന്നണി പാടിയിരിക്കുന്നത്. പ്രശസ്ത സംഗീത സംവിധായകനായ വിദ്യാധരന്‍ മാസ്റ്ററും, ഗാനാലാപനത്തിലും കഴിവ് തെളിയിച്ച നടന്‍ ഇന്ദ്രജിത്ത് സുകുമാരനും, യുവ ഗായിക ദിവ്യ.എസ്. മേനോനും ചേര്‍ന്നാണ് ഈ ഗാനം ആലപിച്ചിട്ടുള്ളത്. ഈ ഗാനരംഗത്തില്‍ പാടി അഭിനയിക്കാനും നൃത്തം ചെയ്യാനും ഉള്ള അവസരവും ഇന്ദ്രജിത്ത് സുകുമാരന് ലഭിച്ചിട്ടുണ്ട്.
കാല്‍പ്പനികതയും കാവ്യ ഭംഗിയും അടങ്ങിയ വരികളില്‍ ജീവിതവും മരണവും സ്വര്‍ഗ്ഗാനുഭവും എല്ലാം കോര്‍ത്ത് ഇണക്കി അവതരിപ്പിച്ചിരിക്കുന്നു. ഗാനത്തിന് വരികള്‍ എഴുതിയിരിക്കുന്നത് പല ഹിറ്റ് ഗാനങ്ങള്‍ക്കും വരികള്‍ ഒരുക്കിയ സന്തോഷ് വര്‍മ്മയാണ്. തിരശീലയില്‍ ഒരു പുതുമയാര്‍ന്ന കാസ്റ്റിംഗും ഈ ചിത്രത്തിന്റെ പ്രത്യേകതയായി അനുഭവപ്പെടുന്നു. ഇന്ദ്രജിത്ത് സുകുമാരന്, നൈല ഉഷ, ബാബുരാജ്, സരയൂ മോഹന്‍, മല്ലിക സുകുമാരന്, ശാരി, ഹരിശ്രീ അശോകന്‍, ബിജു സോപാനം, ശരത് ദാസ്, അല്‍താഫ് മനാഫ്, ബാലതാരമായ ആഷ്‌വി എന്നിവരോടൊപ്പം തെന്നിന്ത്യയുടെ മഹാനടന്‍ പ്രകാശ് രാജും പ്രമുഖ വേഷത്തില്‍ എത്തുന്നു എന്ന പ്രത്യേകത ചിത്രത്തിനുണ്ട്. ഗാനത്തിന് ഇണങ്ങുന്ന നൃത്ത ചുവടുകള്‍ ചിട്ടപ്പെടുത്തിയത് ശ്രീജിത്ത് ഡാന്‍സിറ്റിയാണ്.
സനല്‍. വി. ദേവന്‍ ആദ്യമായി സംവിധാനം ചെയ്യുന്ന ചിത്രത്തില്‍ അഭയകുമാര്‍. കെ, അനില്‍ കുര്യന്‍ എന്നിവര്‍ കഥ, തിരക്കഥ, സംഭാഷണം എഴുതുന്നു. വൗ സിനിമാസ് എന്ന ബാനറില്‍ ‘കുഞ്ഞമ്മിണിസ് ഹോസ്പിറ്റല്‍’ ഒരുക്കിയിരിക്കുന്നത്.
പ്രതികരിക്കാൻ ഇവിടെ എഴുതുക: