ബംഗളൂരു: ലഹരി ഇടപാടില് ബംഗളൂരുവില് അറസ്റ്റിലായ മലയാളികള് ഉള്പ്പടെയുള്ള പ്രതികള്ക്ക് സാമ്പത്തിക സഹായം നല്കി കള്ളപ്പണം വെളുപ്പിച്ചുവെന്ന കേസിലെ പ്രതിപ്പട്ടികയില് നിന്ന് ഒഴിവാക്കണമെന്ന് ബിനീഷ് കോടിയേരിയുടെ ആവശ്യം കോടതി തള്ളി. ബിനീഷ് നല്കിയ ഹര്ജി മുപ്പത്തിനാലാം അഡീഷണല് സിറ്റി സിവില് ആന്ഡ് സെഷന്സ് കോടതി ജഡ്ജിയാണ് തള്ളിയത്. ബിനീഷിനെതിരെ അതീവ ഗുരുതരമായ നിരീക്ഷണങ്ങളോടെയാണ് ഹര്ജി കോടതി തള്ളിയത്.
ബിനീഷ് കോടിയേരിക്ക് ഒന്നാം പ്രതി മുഹമ്മദ് അനൂപിന്റെ ലഹരി ഇടപാടുകളെ കുറിച്ചും കച്ചവടത്തെ കുറിച്ചും വ്യക്തമായ അറിവുണ്ടായിരുന്നെന്നാണ് കോടതി നിരീക്ഷിച്ചു. അനൂപും ബിനീഷും കൊക്കൈന് ഉപയോഗിക്കുന്നത് നേരിട്ട് കണ്ടെന്ന രണ്ട് സാക്ഷി മൊഴികളുടെ അടിസ്ഥാനത്തിലാണ് കോടതി ഇക്കാര്യം ഉത്തരവില് വ്യക്തമാക്കുന്നത്. ബിനീഷ് കോടിയേരിയുമായി ബന്ധമുള്ള കമ്മനഹള്ളിയിലെ റോയല് സ്യൂട്ട് അപ്പാര്ട്മെന്റില് നിന്നാണ് എംഡിഎംഎ ഗുളികളുമായി അനൂപും മറ്റുള്ളവരും പിടിയിലാകുന്നത്. ഇതെല്ലാം അര്ത്ഥമാക്കുന്നത് ഒന്നാം പ്രതിയുടെ ബിസിനസ് സംബന്ധിച്ച് ബിനീഷിന് നേരെത്തെ അറിവുണ്ടായിരുന്നു എന്നാണെന്നും കോടതി നിരീക്ഷിച്ചു.
ലഹരി ഇടപാട് കേസില് അറസ്റ്റിലായ ഒന്നാം പ്രതി മുഹമ്മദ് അനൂപിന് സാമ്പത്തിക സഹായം ചെയ്തെന്ന കണ്ടെത്തലില് 2020ല് ആണ് ബിനീഷ് കോടിയേരി അറസ്റ്റിലായത്. കേസ് കെട്ടിച്ചമച്ചതാണെന്ന വാദം ആവര്ത്തിച്ചായിരുന്നു ബിനീഷ് പ്രതിപട്ടികയില് നിന്ന് ഒഴിവാക്കണമെന്ന ഹര്ജി നല്കിയത്.
