ന്യൂദല്ഹി: മോദിയുടെ ഭരണകാലത്ത് മുസ്ലിങ്ങളുടെ അവസ്ഥ 1980കളിലെ ദളിതരുടേതിന് തുല്ല്യമാണെന്ന രാഹുല്ഗാന്ധിയുടെ വിമര്ശനത്തെ തള്ളി മുതിര്ന്ന ബിജെപി നേതാവും മുന് കേന്ദ്രമന്ത്രിയുമായ മുഖ്താര് അബ്ബാസ് നഖ് വി. കോണ്ഗ്രസ് ഭരണകാലത്ത് മുസ്ലിങ്ങളെ ച്യൂയിംഗ് ഗം പോലെയാണ് ഉപയോഗിച്ചതെന്നും ഇന്ത്യയെ വിദേശരാജ്യങ്ങളില് നാണം കെടുത്താനുള്ള കരാറാണ് രാഹുല്ഗാന്ധി ഏറ്റെടുത്തിരിക്കുന്നതെന്നും അദ്ദേഹം പറഞ്ഞു.
“രാഹുല് വിദേശത്തുപോകുമ്പോള് ജിന്നയുടെ ആത്മാവോ അല് ഖ്വെയിദ പോലുള്ള ആളുകളുടെ ചിന്താഗതിയോ രാഹുല് ഗാന്ധിയില് പ്രവേശിക്കുകയാണ്. ഇന്ത്യയില് തിരികെയെത്തിയാല് മികച്ച ബാധയൊഴിപ്പിക്കലുകാരനാല് അവയെ ഒഴിപ്പിച്ചുവിടണം. “- മുഖ്താര് അബ്ബാസ് നഖ് വി അഭിപ്രായപ്പെട്ടു.
സ്വന്തം ജന്മിത്വ കുത്തകാധികാരം വികസനപ്രവര്ത്തനങ്ങളിലൂടെ പ്രധാനമന്ത്രി നരേന്ദ്ര മോദി നശിപ്പിച്ചത് ഇന്ന് ആര്ക്കം അംഗീകരിക്കാന് സാധിക്കാത്തതാണ് രാഹുല് ഗാന്ധിയുടെ പ്രശ്നം.”- മുഖ്താര് അബ്ബാസ് നഖ് വി പറഞ്ഞു.
വെറുപ്പിന്റെ ആഗോള കച്ചവടക്കാരനായി രാഹുല് ഗാന്ധി മാറിയിരിക്കുകയാണ്. വര്ഗ്ഗീയതയുടെ വോട്ട് രാഷ്ട്രീയം മോദി എന്നെന്നേയ്ക്കുമായി തകര്ത്തതാണ് രാഹുല്ഗാന്ധിയെപ്പോലുള്ളവരുടെ പ്രശ്നം. -നഖ് വി പറഞ്ഞു.
കോണ്ഗ്രസ് എന്നാല് ഇന്ത്യയാണെന്നും ഇന്ത്യയെന്നാല് കോണ്ഗ്രസാണെന്നും രാഹുല് കരുതുന്നു. മോദിയെ ആക്രമിക്കുക എന്നാല് അതുവഴി ഇന്ത്യയെ ആക്രമിക്കാനാണ് രാഹുലിന്റെ ശ്രമം. – നഖ് വി ചൂണ്ടിക്കാട്ടി.
