ഓക്‌സെ: ഫ്രഞ്ച് ലിഗ് വണ്‍ കിരീടം നേടാന്‍ പാരിസ് സെന്റ് ജെര്‍മെയ്(പിഎസ്ജി)ന് ഇനി വേണ്ടത് ഒരേയൊരു പോയിന്റ് മാത്രം. ഇന്നലെ നടന്ന കളിയില്‍ ഓക്‌സെക്കെതിരെ 2-1ന്റെ ജയം നേടിയതോടെ ടീമിന് പട്ടികയില്‍ 84 പോയിന്റായി. തൊട്ടുപിന്നിലുള്ള ലെന്‍സിനെക്കാള്‍ ആറ് പോയിന്റ് മുന്നില്‍. ലീഗില്‍ രണ്ട് മത്സരങ്ങള്‍ കൂടി അവശേഷിക്കെ ഒരു സമനിലമാത്രം മതി പിഎസ്ജിക്ക് കപ്പടിക്കാന്‍.
ഓക്‌സെയെ അവരുടെ തട്ടകത്തിലാണ് പിഎസ്ജി ഇന്നലെ തോല്‍പ്പിച്ചത്. തുടക്കത്തിലേ തെന്ന സൂപ്പര്‍താരം കിലിയന്‍ എംബപ്പെ നേടിയ ഇരട്ടഗോളില്‍ പിഎസ്ജി ആധിപത്യം പുലര്‍ത്തി. പിന്നീട് പത്തിലേറെ ഗോള്‍ ശ്രമങ്ങള്‍ നടത്തിയെങ്കിലും ഫലത്തിലെത്തിയില്ല.
പിഎസ്ജിക്കായി എംബപ്പെ നേടിയ രണ്ട് ഗോളുകളിലും സൂപ്പര്‍ താരം ലയണല്‍ മെസ്സി ഭാഗവാക്കായിരുന്നു. പെനല്‍റ്റി ഏരിയക്ക് പുറത്ത് മെസ്സി തുടങ്ങിവച്ച നീക്കമാണ് ഏഴാം മിനിറ്റിലെ ആദ്യഗോളില്‍ കലാശിച്ചത്. തൊട്ടടുത്ത മിനിറ്റില്‍ എംബപ്പെ നേടിയ ഗോള്‍ മെസ്സിയുടെ പാസില്‍ നിന്നായിരുന്നു. എംബപ്പെയുടെ അത്യുഗ്രന്‍ ഫിനിഷിലൂടെയാണ് രണ്ട് ഗോളുകളും നേടി പിഎസ്ജി ജയം ഉറപ്പിച്ചത്.
രണ്ടാം പകുതിയില്‍ 51-ാം മിനിറ്റിലാണ് ഓക്‌സേ മത്സരത്തിലെ ഒരു ഗോള്‍ തിരിച്ചടിച്ചത്. ലാസ്സിന്‍ സിനയോകോ ആണ് ഗോള്‍ നേടിയത്. 14 ഗോള്‍ ശ്രമങ്ങള്‍ നടത്തിയ ഓക്‌സെ ഏഴ് ഓണ്‍ ടാര്‍ജറ്റുകളുതിര്‍ത്തു.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: