തിരുവനന്തപുരം: പത്തുപേര്ക്ക് ജീവന് പകുത്തുനല്കി വിട പറഞ്ഞ സാരംഗിന്റെ വീട് സന്ദര്ശിച്ച് കേന്ദ്ര വിദേശകാര്യ സഹമന്ത്രി വി. മുരളീധരന്. ആലംകോട് വഞ്ചിയൂരിലെ വീട്ടില് ഇന്നലെ ഉച്ചയോടെ ആണ് വി. മുരളീധരന് സന്ദര്ശനം നടത്തിയത്. എസ്.എസ്.എല്.സി പരീക്ഷയില് മുഴുവന് വിഷയങ്ങളിലും എപ്ലസ് നേടിയ സന്തോഷവാര്ത്തയറിയാന് കാത്തുനില്ക്കാതെ സാരംഗ് മരണത്തിന് കീഴടങ്ങുക ആയിരുന്നു.
തീര്ത്തും ദുഃഖകരമായ സാഹചര്യത്തിലും അവയവദാനത്തിന് സന്നദ്ധത അറിയിച്ച കുടുംബത്തെ ഹൃദയം തുറന്ന് അഭിനന്ദിക്കുന്നതായി കേന്ദ്രമന്ത്രി പറഞ്ഞു. മാതൃകാപരമായ ഒരു വലിയ കാര്യം ചെയ്താണ് സാരംഗ് നമ്മെ വിട്ടുപിരിഞ്ഞത് എന്നും വി. മുരളീധരന് കൂട്ടിച്ചേര്ത്തു. മാതാപിതാക്കള്ക്ക് ഒപ്പം അല്പനേരം ചിലവഴിച്ചാണ് സാരംഗിന്റെ ഓര്മകള് ഉറങ്ങുന്ന നികുഞ്ജം വീട്ടില് നിന്ന് മന്ത്രി മടങ്ങിയത്.
