മുംബൈ : തിരക്കേറിയ റോഡിലൂടെ അജ്ഞാതന്റെ വാഹനത്തില്‍ കയറി കൃത്യസമയത്ത് ഷൂട്ടിങ്ങിനായി എത്തിയെങ്കിലും ഹെല്‍മറ്റ് വെക്കാത്തതിനാല്‍ പുലിവാല് പിടിച്ച് ബോളീവുഡ് താരം അമിതാഭ് ബച്ചന്‍. റിഭു ദാസ്ഗുപ്ത സംവിധാനം ചെയ്യുന്ന സെക്ഷന്‍ 84 ന്റെ ചിത്രീകരണ സ്ഥലത്തേക്ക് ഞായറാഴ്ച എത്തുന്നതിനിടെ താരം ഗതാഗത കുരുക്കില്‍ പെടുകയും തുടര്‍ന്ന് അജ്ഞാതനായ ബൈക്ക് യാത്രികന്റെ സഹായം തേടുകയുമായിരുന്നു. അമിതാഭ് ബച്ചന്‍ ഇന്‍സ്റ്റഗ്രാമിലൂടെ നന്ദി അറിയിച്ചതോടെയാണ് സംഭവം പുറത്തറിയുന്നത്.
‘നന്ദി സഹോദരാ, നിങ്ങള്‍ ആരാണെന്ന് അറിയില്ല. എന്നെ കൃത്യസമയത്ത് ജോലി സ്ഥലത്തെത്തിച്ച നിങ്ങളോട് ഞാന്‍ കടപ്പെട്ടിരിക്കുന്നുവെന്നായിരുന്നു അമിതാഭിന്റെ കുറിപ്പ്. അജ്ഞാതനൊപ്പം ബൈക്കില്‍ യാത്രചെയ്യുന്ന ചിത്രവും കുറിപ്പിനൊപ്പം അദ്ദേഹം പങ്കുവെച്ചു. തൊപ്പിവെച്ച് മഞ്ഞ ടീ ഷര്‍ട്ടും ഷോട്ട്‌സുമായിരുന്നു ബൈക്കിലെ അജ്ഞാതന്റെവേഷം.
എന്നാല്‍ ചിത്രം സാമൂഹിക മാധ്യമങ്ങളില്‍ വൈറലായതോടെ യാത്രക്കാരനും വാഹനം ഓടിച്ചയാള്‍ക്കും ഹെല്‍മറ്റ് ഇത്താതിരുന്നതും ചര്‍ച്ചയാവുകയായിരുന്നു. ഹെല്‍മെറ്റ് ധരിക്കാതെ ഇരുചക്ര വാഹനത്തില്‍ യാത്ര ചെയ്തത് നിയമവിരുദ്ധമാണെന്നും ഇതിനെതിരേ നടപടി സ്വീകരിക്കണം. താരം എന്ന നിലയില്‍ ജനങ്ങള്‍ മാതൃകയാക്കേണ്ട ഒരു വ്യക്തി ഇത്തരത്തില്‍ വീഴ്ച വരുത്താന്‍ പാടില്ലായിരുന്നുവെന്നും വിമര്‍ശനങ്ങള്‍ ഉയര്‍ന്നിട്ടുണ്ട്. ഇതോടെ നടപടി സ്വീകരിക്കുമെന്നാണ് മുംബൈ പോലീസും പ്രതികരിച്ചിട്ടുണ്ട്.
പ്രതികരിക്കാൻ ഇവിടെ എഴുതുക: