കൊച്ചി: മാരത്തണ് ഓടാന് വസ്ത്രരീതി ഒരു പ്രശ്നമല്ലെന്ന് തെളിയിച്ചിരിക്കുകയാണ് കാസര്കോഡ് കോളിയടുക്കം സ്വദേശി പത്മിനി നായര്. സാരി ധരിച്ചാണ് ഈ വീട്ടമ്മ ഫെഡറല് ബാങ്ക് കൊച്ചി മാരത്തണിലെ 3 കിമീ ഗ്രീന് റണ് ഓടിയത്. 2020 മുംബൈ മാരത്തണിലും സാരി ധരിച്ചാണ് പത്മിനി പങ്കെടുത്തത്.
മാലിന്യമുക്തവും സുരക്ഷിതവുമായ കേരളം എന്ന സ്വപ്നം യാഥാര്ഥ്യമാകണമെന്നും അതാണ് ഈ മാരത്തണില് പങ്കെടുക്കാന് മാത്രമായി കൊച്ചിയില് എത്തിയതെന്നും അവര് പറഞ്ഞു. മൂന്ന് കിലോമീറ്റര് വിജയകരമായി ഓടി തീര്ത്ത് മെഡലുമായി നില്ക്കുമ്പോള് സ്വപ്നങ്ങള് യാഥാര്ഥ്യമാക്കാന് വസ്ത്രധാരണ രീതി ഒരു തടസമല്ല എന്ന് ഉറക്കെ വിളിച്ചുപറയുന്നതായിരുന്നു പത്മിനി നായരുടെ മുഖത്തെ ആത്മവിശ്വാസം.
