തിരുവനന്തപുരം : സംസ്ഥാനത്തെ എഐ ക്യാമറകള് ഇന്ന് മുതല് പ്രവര്ത്തനം ആരംഭിക്കും. മുഖ്യമന്ത്രി പിണറായി വിജയന് ഉദ്ഘാടനം നിര്വഹിക്കും. 726 ക്യാമറകളാണ് മോട്ടോര് വാഹന വകുപ്പ് സംസ്ഥാന വ്യാപകമായി സ്ഥാപിച്ചിട്ടുള്ളത്. ഇന്ന് മുതല് തന്നെ എഐ ക്യാമറക്കണ്ണില്പ്പെടുന്ന ഗതാഗത നിയമലംഘനങ്ങള്ക്കെല്ലാം പിഴയും ഈടാക്കുന്നതാണ്.
നഗര- ഗ്രാമ വ്യത്യസമില്ലാതെ ക്യാമറകള് സ്ഥാപിച്ചിട്ടുണ്ട്. സംസ്ഥാനത്ത് ആദ്യമായാണ് നിര്മിത ബുദ്ധി ക്യാമറകള് വഴി നിയമലംഘനങ്ങള് പിടികൂടി പിഴയീടാക്കാനൊരുങ്ങുന്നത്. അനധികൃത പാര്ക്കിങ്ങിനാണ് ഏറ്റവും കുറഞ്ഞ പിഴത്തുക ഈടാക്കുക, 250 രൂപ. അമിതവേഗം സീറ്റ് ബെല്റ്റും- ഹെല്മറ്റും ധരിക്കാതെയുള്ള യാത്ര, ഡ്രൈവ് ചെയ്യുമ്പോഴുള്ള മൊബൈല് ഉപയോഗം, രണ്ടുപേരില് കൂടുതല് ഇരുചക്രവാഹനത്തില് യാത്ര ചെയ്യുന്നത്, റെഡ് ലൈറ്റ് മറികടക്കല് എന്നിവയാണ് എഐ ക്യാമറകള് പിടികൂടുന്നത്. നിയമലംഘനം ക്യാമറ പിടികൂടിയാല് ഉടന് വാഹന ഉടമയുടെ മൊബൈലേക്ക് പിഴയടക്കാനുള്ള സന്ദേശമെത്തും. ഒരാഴ്ചക്കുള്ളില് പോസ്റ്റിലൂടെ ഇ- ചെല്ലാനുമെത്തും. 30 ദിവസത്തിനുളളില് പിഴ അടച്ചില്ലെങ്കില് മോട്ടോര് വാഹനവകുപ്പ് നോട്ടീസച്ച് തുടര് നടപടികളിലേക്ക് കടക്കും. ഇരുചക്രവാഹനങ്ങളില് രക്ഷിതാക്കള്ക്കൊപ്പം ഒരു കുട്ടി യാത്ര ചെയ്താലും പിഴ വീഴും.
എന്നാല് ബീക്കണ് ലൈറ്റ് ഘടിപ്പിച്ച വാഹനങ്ങള്ക്ക് മാത്രമാണ് ഇളവുള്ളത്. ട്രെയല് റണ് നടത്തിയപ്പോള് പ്രതിദിനം 95,000വരെ നിയമലംഘനങ്ങള് കണ്ടെത്തിയിരുന്നു. ഇത്തരത്തില് നിയമലംഘനങ്ങള് ആവര്ത്തിച്ചാല് കോടികള് സര്ക്കാര് ഖജനാവിലേക്കെത്തും. മൂന്നരക്കാണ് എഐ ക്യാമറകള് ഉദ്ഘാടനം ചെയ്യുന്നത്. കെല്ട്രോളാണ് ക്യാമറകള് സ്ഥാപിച്ചിരിക്കുന്നത്. മൂന്നു വര്ഷത്തേക്ക് കെല്ട്രോണുമായുള്ള കരാര്. കണ്ട്രോള് റൂമിന്റെ പ്രവര്ത്തനവും ക്യാമറകളുടെ പരിപാലനുവും കെല്ട്രോണിന്റെ ചുമതലയാണ്. സംസ്ഥാന തലത്തിലും ജില്ലാ തലത്തിലും പ്രവര്ത്തിക്കുന്ന കണ്ട്രോള് റൂം വഴിയാണ് പിഴ ചുമത്താനുള്ള ചെല്ലാനുകള് നല്കുന്നത്.
