കൂവപ്പടി ജി. ഹരികുമാര്
കൊച്ചി: കേരളത്തിന്റെ മേടവിഷുപ്പുലരിയ്ക്ക് ഒരു ദിവസം മാത്രം ബാക്കി നില്ക്കെ വിവിധ രാജ്യങ്ങളിലേയ്ക്ക് കടല്കടന്നത് ഏഴു ടണ്ണോളം കൊന്നപ്പൂക്കള്. അറബ് എമിറേറ്റുകളിലേയ്ക്ക് മാത്രമായി വേണ്ടത് മൂന്നരടണ്. കണികാണാന് എന്തു വിലകൊടുത്തും കൊന്നപ്പൂക്കളും തൂശനിലകളും വാങ്ങാന് തയ്യാറുള്ള മലയാളികള് ധാരാളമുള്ളയിടമാണ് യുഎഇ അബുദാബിയിലും ദുബായിയിലും വില്പ്പന പൊടിപൊടിക്കുന്ന സന്തോഷത്തിലാണ് ദുബായിയിലെ പെരുമാള് ഫ്ളവേഴ്സ് ഉടമ, എസ്. പെരുമാള്.
ഇന്ത്യയ്ക്കു പുറമെ വിദേശരാജ്യങ്ങളില് നിന്നും പൂവെത്തുന്നതുകൊണ്ടാണ് ആവശ്യക്കാര്ക്ക് എത്തിയ്ക്കാനാകുന്നത്. വിദേശ വിപണികളിലെ വിഷുക്കച്ചവടം മുന്വര്ഷങ്ങളെക്കാള് കൂടുതല് സജീവമാണ് ഗള്ഫില്. വിമാനമാര്ഗ്ഗമെത്തുന്ന പൂക്കള്ക്കായി കാത്തിരിക്കുകയാണ് മലയാളികള്. കോയമ്പത്തൂരില് നിന്നും ആനക്കട്ടിയില് നിന്നും ശേഖരിക്കുന്ന കൊന്നപ്പൂവ് കോഴിക്കോട്, കൊച്ചി, കണ്ണൂര്, ട്രിച്ചി, കോയമ്പത്തൂര്, ബെംഗളൂരു വിമാനത്താവളങ്ങള് വഴിയാണ് വിദേശങ്ങളിലേയ്ക്ക് കയറ്റി അയക്കുന്നത്. ഗള്ഫിലെത്തുമ്പോള് വില 40 ദിര്ഹമാകും (892 രൂപ). വീട്ടാവശ്യത്തിനുള്ള പൂക്കളുടെ ചെറിയ പാക്കറ്റുകള്ക്കാണ് ആവശ്യക്കാരേറെ. 5,10 ദിര്ഹം നല്കിയാല് (111, 223 രൂപ) മലയാളിക്ക് ഗള്ഫില് കണികാണല് ഗംഭീരമാക്കാം.
മുല്ലപ്പൂ ഉള്പ്പെടെ മറ്റു പൂക്കളുമുണ്ട്. തൂശനില, കണ്ണിമാങ്ങ, ചക്ക, വെള്ളരി, പൈനാപ്പിള്, പഴം, വാല്ക്കണ്ണാടി തുടങ്ങിയവയും ഇത്തവണ എത്തിച്ചിട്ടുണ്ട്. മധുരൈ സ്വദേശിയായ എസ്. പെരുമാള് 1990-ല് ഗള്ഫില് പൂക്കച്ചവടം തുടങ്ങിയതാണ്. 23 വര്ഷത്തെ പൂവില്പ്പനയിലൂടെ ദുബായ്, അബുദാബി, മസ്കറ്റ്, ഷാര്ജ, ഒമാന്, അജ്മന് തുടങ്ങിയയിടങ്ങളിലൊക്ക പെരുമാള് ഫ്ളവേഴ്സ് പൂക്കടകള് തുടങ്ങി. യുഎഇയിലെ മലയാളിയുടെ ഓണത്തിനും വിഷുവിനും പൂക്കളെത്തിച്ചു നല്കുന്നവരില് മുന്പന്തിയില് പെരുമാളുണ്ട്. പെരുമാള് ഫ്ലവര്ഷോപ്പ് എന്നു പറഞ്ഞാല് പ്രവാസികളുടെ പൂന്തോപ്പാണെന്നു പറയാം.
