തൊടുപുഴ. വൈദ്യുതി സംബന്ധമായ പരാതികള്‍ ഓട്ടോമാറ്റിക്കായി അതിവേഗത്തില്‍ രേഖപ്പെടുത്താന്‍ കെഎസ്ഇബി ഉപഭോക്താക്കള്‍ക്ക് ഇനി ക്ലൗഡ് ടെലിഫോണി സൗകര്യം. ആയിരക്കണക്കിന് ഉപഭോക്താക്കള്‍ക്ക് ഒരേ സമയം പരാതികള്‍ രേഖപ്പെടുത്താനും വിവരങ്ങള്‍ ലഭ്യമാക്കാനുമുള്ള സംവിധാനമാണ് ഒരുങ്ങുന്നത്.
വൈദ്യുതി തടസം, വോള്‍ട്ടേജ് ക്ഷാമം, ഓണ്‍ലൈന്‍ പേയ്മെന്റ്, വൈദ്യുതി ബില്‍ തുടങ്ങി എല്ലാ പരാതികളും രേഖപ്പെടുത്താനും പുതിയ കണക്ഷന്‍ ഒഴികെയുള്ള വാതില്‍പ്പടി സേവനങ്ങള്‍ക്കായി രജിസ്റ്റര്‍ ചെയ്യാനും ഈ സംവിധാനത്തിലൂടെ കഴിയും. 9496001912 എന്ന മൊബൈല്‍ നമ്പരിലേക്ക് വിളിച്ചാല്‍ ഈ സേവനം ലഭ്യമാകും. വാട്സ്ആപ്, എസ്എംഎസ് മാര്‍ഗ്ഗങ്ങളിലൂടെ ക്ലൗഡ് ടെലിഫോണി സേവനങ്ങള്‍ നല്കുന്ന സംവിധാനവും രണ്ടാംഘട്ടമായി ഏര്‍പ്പെടുത്തും.
നിലവില്‍ സൗകര്യങ്ങള്‍ ലഭിക്കാനായി സെക്ഷന്‍ ഓഫീസിലെ ലാന്‍ഡ് ഫോണിലേക്കോ 1912 എന്ന ടോള്‍ഫ്രീ കസ്റ്റമര്‍കെയര്‍ നമ്പരിലേക്കോ ആണ് ഉപഭോക്താക്കള്‍ ബന്ധപ്പെടുന്നത്. പതിനയ്യായിരത്തോളം ഉപഭോക്താക്കളുള്ള സെക്ഷന്‍ ഓഫീസില്‍ ഒരു സമയം ഒരാള്‍ക്ക് മാത്രമാണ് ഫോണില്‍ ബന്ധപ്പെടാനാവുക. ഇത് പലപ്പോഴും വലിയ പ്രതിഷേധങ്ങള്‍ക്ക് ഇടയാക്കാറുണ്ട്. മഴയും കാറ്റും ഉള്ള സമയങ്ങളില്‍ ഏറെ നേരം ശ്രമിച്ചെങ്കില്‍ മാത്രമാണ് ഫോണില്‍ ബന്ധപ്പെടാന്‍ ആവുക.
1912 കോള്‍ സെന്ററില്‍ ഒരേ സമയം 48 പേര്‍ക്ക് വരെ ബന്ധപ്പെടാനാകും. മഴക്കാലങ്ങളിലും പ്രകൃതിക്ഷോഭ സമയത്തും നിരവധി പേര് പരാതി അറിയിക്കാന്‍ വിളിക്കുന്ന സാഹചര്യത്തില്‍ ഫോണില്‍ ദീര്‍ഘസമയം കാത്തുനില്‍ക്കേണ്ട അവസ്ഥ പലപ്പോഴും പരാതിക്ക് കാരണമായിട്ടുണ്ട്. അതിനാല്‍ തന്നെ പലപ്പോഴും കൃത്യസമയത്ത് പരാതി അറിയിക്കാനും ഉപഭോക്താക്കള്‍ സാധിക്കാതെ വരാറുണ്ട്. എന്നാല്‍ ക്ലൗഡ് ടെലിഫോണി സംവിധാനം യാഥാര്‍ത്ഥ്യമാകുന്നതോടെ ഈ ബുദ്ധിമുട്ട് പൂര്‍ണമായും ഇല്ലാതാകുമെന്നാണ് പ്രതീക്ഷ.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: