കോഴിക്കോട്: ആലപ്പുഴ കണ്ണൂര് എക്സ്പ്രസ് ട്രെയിന് തീ വെച്ച സംഭവത്തില് പ്രതിയോട് സാമ്യം തോന്നിക്കുന്ന ഒരാള് ചികിത്സ തേടി കണ്ണൂര് ജനറല് ആശുപത്രിയില് എത്തിയതായി റിപ്പോര്ട്ട്. ഇതിന്റെ അടിസ്ഥാനത്തില് പൊലീസ് ആശുപത്രിയിലെത്തി പരിശോധന നടത്തി. പ്രതിയെന്ന് സംശയിക്കുന്ന വ്യക്തിയുടെ രേഖാചിത്രം പൊലീസ് പുറത്തുവിട്ടതിനു പിന്നാലെയാണ് രൂപ സാദൃശ്യമുള്ള ഒരാള് ചികിത്സ തേടി വന്നതായുള്ള വിവരം ആശുപത്രി അധികൃതര് അറിയിക്കുന്നത്.
അതേ സമയം, പ്രതിയുടേതെന്ന പേരില് പ്രചരിക്കുന്ന സിസിടിവി ദൃശ്യങ്ങള് അദ്ദേഹത്തിന്റെതല്ലെന്ന് പൊലീസ് വ്യക്തമാക്കി. കാപ്പാട് സ്വദേശിയായ വിദ്യാര്ത്ഥിയുടേതാണ് ദൃശ്യങ്ങളെന്നാണ് പൊലീസ് വ്യക്തമാക്കിയത്. റോഡരികില് നിന്നയാള് ഫോണ് വിളിക്കുന്നതും, പിന്നീട് അവിടെയെത്തിയ ബൈക്കില് കയറി പോകുന്നതുമാണ് ദൃശ്യങ്ങളിലുള്ളത്.
ഈ ദൃശ്യങ്ങള് കേന്ദ്രീകരിച്ച് നടത്തിയ അന്വേഷണത്തില് ബൈക്കിന്റെ ആര്സി ഉടമയെ പൊലീസ് കണ്ടെത്തി. തുടര്ന്നുള്ള അന്വേഷണത്തിലാണ് സിസിടിവി ദൃശ്യത്തില് കണ്ടത് ട്രെയിനില് അക്രമം നടത്തിയ ആളല്ലെന്ന് പൊലീസ് സ്ഥിരീകരിച്ചത്.
