തിരുവനന്തപുരം: ഇപ്പോള്‍ ആദായവകുപ്പ് ഉദ്യോഗസ്ഥര്‍ റെയ്ഡിന് വിധേയമാക്കിയ ഫാരിസ് അബൂബക്കര്‍ തന്റെ അമ്മാവനല്ലെന്ന് മന്ത്രി മുഹമ്മദ് റിയാസ്. ഈ ആരോപണം ഉന്നയിച്ച പി.സി. ജോര്‍ജ്ജിനെ തള്ളിയാണ് മുഹമ്മദ് റിയാസിന്റെ പ്രതികരണം.
” എന്റെ അമ്മാവന്റെ മകനാണ് ഫാരിസ് അബൂബക്കര്‍ എന്നാണ് ചിലരുടെ ആരോപണം. എന്റെ അമ്മയ്‌ക്ക് അഞ്ച് ആങ്ങളമാരാണുള്ളത്. ഇപ്പോള്‍ പുതിയ ഒരാളെയും കൂടി കിട്ടി. നേരില്‍ കാണാത്ത, ഫോണില്‍ പോലും വിളിച്ചിട്ടില്ലാത്ത ഒരു അമ്മാവനെ കൂടി എനിക്ക് കിട്ടിയിരിക്കുകയാണ്. പണ്ടത്തെ ജയന്റെ സിനിമയൊക്കെ കണ്ടിട്ടുണ്ട്. ജയനും നസീറം അഭിനയിച്ച സിനിമ. കുട്ടികളാകുമ്പോള്‍ അവര്‍ പിരിഞ്ഞുപോകും. എന്നാല്‍ അവര്‍ക്ക് ഒരു പോലുള്ള എന്തെങ്കിലും മറുക് ഉണ്ടായിരിക്കും. കുറെക്കാലം കഴിയുമ്പോള്‍ ജയന്റെ മറുക് നസീറും നസീറിന്റെ മറുക് ജയനും കാണും. അപ്പോള്‍ ബാബു, ഗോപീ എന്ന് പരസ്പരം വിളിച്ച് കെട്ടിപ്പിടിക്കും. അതുപോലെ ഫോണില്‍ പോലും വര്‍ത്തമാനം പറയാത്ത ഒരു അമ്മാവനെ കിട്ടിയതിന്റെ സന്തോഷം പങ്കുവെയ്‌ക്കുന്നു. “- മന്ത്രി മുഹമ്മദ് റിയാസ് പറഞ്ഞു.
മന്ത്രി മുഹമ്മദ് റിയാസിന്റെ അമ്മാവനാണ് ഫാരിസ് അബൂബക്കറെന്നും ഫാരിസിനെ സംരക്ഷിക്കുന്ന നിലപാടാണ് മുഖ്യമന്ത്രിയുടേതെന്നും പി.സി. ജോര്‍ജ്ജ് കഴിഞ്ഞ ദിവസം ആരോപിച്ചിരുന്നു.
പ്രതികരിക്കാൻ ഇവിടെ എഴുതുക: