അഹമ്മദാബാദ് : ലോക ടെസ്റ്റ് ചാംപ്യന്‍ഷിപ് ഫൈനലില്‍ സ്ഥാനമുറപ്പിക്കാന്‍ നിര്‍ണായക പോരാട്ടത്തിന് ഇറങ്ങുന്ന ടീം ഇന്ത്യയ്ക്ക് ആശംസ നേരാന്‍ അഹമ്മദാബാദ് നരേന്ദ്ര മോദി സ്റ്റേഡിയത്തില്‍ നേരിട്ടെത്തി ഇന്ത്യന്‍ പ്രധാനമന്ത്രി നരേന്ദ്ര മോദി. ഓസ്‌ട്രേലിയന്‍ പ്രധാനമന്ത്രി ആന്റണി ആല്‍ബനീസിനൊപ്പമാണ് അദ്ദേഹം സ്റ്റേഡിയത്തിലെത്തിയത്.
മൂന്നാം ടെസ്റ്റിലെ കനത്ത തോല്‍വിയെ തുടര്‍ന്ന് നിരാശയിലായ ഇന്ത്യന്‍ ടീം അംഗങ്ങള്‍ക്കുള്ള പ്രചോദനം കൂടിയായിരുന്നു മോദി നേരിട്ടെത്തി ആശംസ നേര്‍ന്നത്. ടെസ്റ്റ് മത്സരത്തിന് മുന്നോടിയായി ഇന്ത്യന്‍ നായകന്‍ രോഹിത് ശര്‍മയ്‌ക്കുള്ള ടെസ്റ്റ് ക്യാപ് ഇന്ത്യന്‍ പ്രധാനമന്ത്രിയും, ഓസീസ് നായകന്‍ സ്റ്റീവ് സ്മിത്തിനുള്ള ടെസ്റ്റ് ക്യാപ് ഓസീസ് പ്രധാനമന്ത്രിയുമാണ് സമ്മാനിച്ചത്.
തുടര്‍ന്ന് ഇരുവരും സ്റ്റേഡിയം വലംവച്ച് കാണികളെ അഭിവാദ്യം ചെയ്തു. കളിക്കു മുമ്പ് ദേശീയഗാനത്തിനായി അണിനിരന്ന ഇരു ടീമുകളിലെയും താരങ്ങളെയും ക്യാപ്റ്റന്‍മാര്‍ പ്രധാനമന്ത്രിമാര്‍ക്ക് പരിചയപ്പെടുത്തി. തുടര്‍ന്ന് താരങ്ങള്‍ക്കൊപ്പം ദേശീയ ഗാനത്തിനും ഒപ്പം നിന്ന ശേഷമാണ് ഇരു പ്രധാനമന്ത്രിമാരും ഗ്രൗണ്ട് വിട്ടത്.
പ്രതികരിക്കാൻ ഇവിടെ എഴുതുക: