വാഷിങ്ടണ് : 2024ലെ യുഎസ് പ്രസിഡന്റ് തെരഞ്ഞെടുപ്പില് മത്സരിക്കാന് ഒരുങ്ങി മലയാളി വേരുകളുള്ള വിവേക് രാമസ്വാമി. യുഎസിലെ സംരംഭകനും എഴുത്തുകാരനും സാമൂഹ്യ പ്രവര്ത്തകനുമായ വിവേക് രാമസ്വാമി റിപ്പബ്ലിക്കന് പാര്ട്ടിക്കുവേണ്ടിയാണ് തെരഞ്ഞെടുപ്പില് മത്സരിക്കാന് ഒരുങ്ങുന്നത്. സ്ഥാനാര്ത്ഥിത്വം സംബന്ധിച്ച് അന്താരാഷ്ട്ര മാധ്യമത്തിന് നല്കിയ അഭിമുഖത്തിലും വിവേക് രാമസ്വാമി അറിയിച്ചിട്ടുണ്ട്.
അടുത്ത വര്ഷം നടക്കുന്ന യുഎസ് പ്രസിഡന്റ് സ്ഥാനത്തേക്കുള്ള തെരഞ്ഞെടുപ്പില് റിപ്പബ്ലിക്കന് പാര്ട്ടിയില് നിന്നും ഇതുവരെ വിവേക് അടക്കം മൂന്നുപേരാണ് സ്ഥാനാര്ത്ഥിത്വം പ്രഖ്യാപിച്ചിട്ടുള്ളത്. ‘ഈ രാജ്യത്ത് അതിന്റെ ആദര്ശങ്ങള് പുനരുജ്ജീവിപ്പിക്കാന് പ്രസിഡന്റ് സ്ഥാനത്തേക്ക് മത്സരിക്കുകയാണെന്ന് പറയുന്നതില് താന് അഭിമാനിക്കുന്നു. ജീവിതത്തിന്റെ ഓരോ നിമിഷത്തിലും അമേരിക്കയെ തിരികെ കൊണ്ടുവരുന്നതിനായിരിക്കണം മുന്ഗണന നല്കുന്നതെന്നും സ്ഥാനാര്ത്ഥിത്വം പ്രഖ്യാപിച്ചുകൊണ്ട് വിവേക് രാമസ്വാമി അറിയിച്ചു. നിക്കി ഹേലി, മുന് യുഎസ് പ്രസിഡന്റ് ഡൊണാള്ഡ് ട്രംപ് എന്നിവരാണ് തെരഞ്ഞെടുപ്പില് 37കാരനായ രാമസ്വാമിയുടെ എതിരാളികള്.
ബയോഫാര്മസ്യൂട്ടിക്കല് കമ്പനിയായ റോവന്റ് സയന്സ് സ്ഥാപകനും സ്ട്രൈവ് അസ്റ്റ് മാനേജ്മെന്റ് സഹസ്ഥാപകനുമായ വിവേക് അമേരിക്കയിലാണ് ജനിച്ചതും വളര്ന്നതും. അദ്ദേഹത്തിന്റെ അച്ഛനും അമ്മയും യുഎസിലേക്ക് കുടിയേറിപ്പാര്ക്കുകയായിരുന്നു.
തൃപ്പൂണിത്തുറ സ്വദേശിയായ വിവേക് രാമസ്വാമിയുടെ അമ്മ ഗീതാ രാമസ്വാമി ഒരു വയോജന മനോരോഗ വിദഗ്ദ്ധയും. പാലക്കാട് വടക്കാഞ്ചേരി സ്വദേശിയായ പിതാവ് വി.ജി.രാമസ്വാമി ജനറല് ഇലക്ട്രിക്കില് എഞ്ചിനീയറും പേറ്റന്റ് അഭിഭാഷകനുമായിരുന്നു.
